Munhen əmniyyətiyə iclosədə Zərifi sıxənon.

Siloh həvote iyən insonə həxon barədə siyasətonku İroni xarıci vəzir çı ğərbion 2 dimə estandariku tənğidış karde.

İroni xarıci vəzir zinə Munheni əmniyyətiyə iclosədə İroni rəket bərnoməon barədə bə İroni 8 sornə icbor bıə canqi cərəyonədə çandə ğərbiyə kişvəron bə Sədam rejimi siloh doe işorəş karde və votışe: ım şərayet qılə holədə be ki hiç kişvər hətto qədə mudafiə abjori bə İron doeş nıbe.

Zərif bə məntəğə kişvəron anədə siloh həvote xoto ğərbiyə kişvəron hevojə hosi işorəş karde və təkidış ka: qılə holədə ki İron hiç kəsiku siloh hırye icozəş ni əmə bəpe çoknə ıştəniku mudafiə kəmon.

Zərif votışe: bə Əmniyyət Şura ğətnomə əsos İron karde bəzne ətomiyə silohon bə kəno ıştə rəketiyə ğudrəti ziyod bıkə.

İroni xarıci vəzir ətomiyə sazışiku Amerkə xarıc bey barədə təkidış ka: çəy vaxt rəsə ki Amerkə i tərəfə siyasəton vədə Avropa ıştəniku xərcon bıdə və İron karde ni bəzne ım muğaviləku xaric bey xərcon cayli ğəbul bıkə.

Əv bə Amerkə 40 sornə fişaron işorəş karde və votışe: İroni millət hiç vaxt Amerkə vədə təslim bənin və ım çı Amerkə siyasətonin ki məntəğə vey yolə be stabiləkə amil hisob bıdə.

Zərif çı Almaniya Munhen əmniyyətiyə iclosədə bə Ərəbistoni bıhran icodəkə siyasəton, Suriyədə İroni ğanuniyə iştirok Yəməni bıhran, Amerkə i tərəfə siyasəton, Fələstini məsələ, sionist rejimi cinoyəton ijən Avropa tərəfo maliyə mıbodilə məxsosə sistemi zəifəti işorəş ka.

Munhen əmniyyətiyə iclos cımə de dınyo siyasi, əmniyyəti, xarıci və mudafiə rəsmi şəxson huzuri Almaniyadə bino bıə be.