İroni sepah təşkilati terroristi elan karde barədə reaksiyaon dəvom.

Dınyo və məntəğə muxtəlif qrupon iyən rəsmi şəxson tərəfo reaksiyaon Amerkə tojə be məxə hərəkət İroni sepah təşkilati bənə terrorçiyə qrup elan karde barədə dəvom kardedə.

Tırkiyə prezident Rəcəb Təyyeb Ərdoğan ımruj Trampiku tənğidış karde və İroni sepah təşkilati bənə terroristiyə qrup zınə məhkumış ka; Ərdoğaniku bənav Tırkiyə xarıci vəzir həm təkidış karde ki hiç kişvəri karde ni bəzne co kişvəri hərbion bənə terroristiyə qrup elan bıkə.

Yaponiya xarıci vəzir iyən Çini xarıci vəzarətxonə həm Amerkə ım hərəkəti ğeyri mənteği və Asiya ğərbədə bıhran icodəkə elanışon karde.

Çinədə İroni səfir və Misrədə İroni mənafe hifzəkə şobə Trampi tojə be ğanunə hərəkəti dınyoədə hərc-mərc icodəkə zınəş bənə və bə de terrorizm mubarizə barədə sahədə İroni sepah təşkilati navəjən bey təkidışon karde.

Bəhreyni inğilabiyə partiyaon, Yəməni Ənsarullah hərəkati, Fələstini Həmas təşkilat, İraği xarıci vəzir, Suriyə xarıci vəzir iyən İraği muğavemətiyə qrupon həm Amerkətojə ğeyri mənteği hərəkət İroni sepah təşkilati bənə terroristiyə qrup elan karde məhkumışon karde və vey xətərnokəku zınəşon bən.

Həsən Ruhani həm zinə şəv de Fransə prezident telefoniyə rabitə təkidış karde ki sepah məntəğədə 2 qılə kişvəronış İŞİD terroristiyə qrupi dastiku xilosış karde.