Zənqənə: İroni nati ixracati bə sıfır rosniye han təbir nibəbe.

İroni nat vəzir Amerkə tojə təhdidon nati sanksiyaon barədə təkidış karde: Amerkə xatir cəm bıbu ki İroni nati ixracati bə sıfır rosniye han təbir nibəbe.

Bijən Namdar Zənqənə zinə İroni islamiyə şura məclisədə əlovəş karde: Amerkə iyən de çəy mıttəfiğ bıə kişvəron bəyaniyə nışo doydə ki çəvon təhdidon hiç foydəş ni və əvon karde ni bəznın nat vujurədə İroni əvəzi tili bıə vırə por bıkən.

İroni nat vəzir təkidış karde: əvoni ki İroni barədə bəyaniyə dodən və İroni nati sanksiyaon xoto de Amerkə həmkari karde fikədən bəpe oğo bıbun ki nat vujuri vəziyət stabil ni iyən ım macəra duyə vulədə bə vey kəson çəş dəbəşe.

Amerkə qıləy bəyaniyədə elanış karde Tramp ijən pidəş ni Mayə manqi bəpeştə İroniku 8 qılə nat hıryə kişvəron anti İron sanksiyaonku ozod bıkə.

Amerkə xarıci vəzir həm qıləy xəbə iclosədə votışe: Ərəbiston iyən İ Bıə Ərəbon Əmirəti nat vujurədə İroni tili bıə vırə pur bəkan.

Əmmo Amerkə ım be ğanunə ğəroli əks ki rəsmən ətomiyə sazışi poymol karde mənodəy.

Tırkiyə xarıci vəzir elanış karde İroni nati əvəzi co kişvəronku nat hırye Amerkə tərəfo qıləy du-təlbis be əsos sıxəne.

Tırkiyə bəpeştə Çin həm rəsmən anti İron sanksiyaon ğeyri ğanuni və i tərəfi zınəş be və bə çəyku təbəiyət nıkarde təkidış karde.