Amerkə təcavuzəkə bepilotə cəsusiyə təyyarə məhv karde barədə reaksiyaon.

İroni xarıci vəzarətxonə siyasi muavin Seyed Əbbas İrağçi telefoniyə rabitə vasitə bə İronədə Amerkə mənafe təminəkə İsveçra səfir elanış karde ki Amerkə bəpe beynəl xalğ ğanuni jentonədə İroni sərzəmini sərhəd və ərazi təmamiyyət barədə oğo bıbu.

İrağçi təkidış karde ki Amerkə cəsosiyə təcavuzkorə təyyarə bə İroni sərhəd varid bey barədə zumandə fakton mıvcudin iyən votışe: İron ıştə sərhədiku mudafiə karde barədə rə iyən ciddi reaksiya nışo bədoy.

Xəbə ome ım təcavuzi bəpeştə İ Bıə Milləton Təşkilatədə İroni nımoyəndə Məcid Təxterəvançi de məktobi vasitə bə ım təşkilati yol Antoniyo Qutereş şikayətış karde və məktobədə Amerkə jıqo təhrikəkə hərəkətonış məhkum karde.

İroni milli əmniyyət aliyə şura sıxənəvot Keyvan Xosrəvi həm İroni ım zumandə reaksiya Amerkə bepilotə təyyarə sərneqon və məhv karde çı İroni hərbion zoti həx-huğuğ hisobış karde və votışe: Amerkə bəpe ıştə be ğanunə hərəkəton məsoliyəti ğəbul bıkə.

İroni xarıci vəzir Muhəmməd Cəvad Zərif həm Twitter mesaji vasitə Amerkə məhv bıə təcavuzkarə bepilotə təyyarə mande baxşon İroni sərzəmini əvonku xaric kardeku xəbəş do.

Əv votışe Amerkə ım təcavuzkarə cəsosiyə bepilotə təyyarə de məxfi əməliyoti əncom doe məğsədi İ Bıə Ərəb Əmironədə bıə hərbi bazaku ome be; Zərifi ım mesajədə cəsosiyə təyyarə əməliyoti detalon de şikili vostə mıəyyən bıə.

İroni xarıci vəzarətxonə sıxənəvot Seyed Əbbas Mosəvi həm zinə təkidış karde: deşmən bəpe oğo bıbu ki İron de zumandəti zəmin, həvo və dıyoədə ıştə sərzəmini təmamiyyəti oqətey xoto şək şobhəş ni.

Dınyo mediyaonədə Amerkə ım təcavuz və İroni zumandə reaksiya vey diğğət iyən nəzəron bəştə tərəf cəlbış karde.