Ankaradə setərəfinə sammiti ğətnamə

İşambə ruji Ankaradə İron, Rusiya və Turkiyə prezidenton Suriyadə vəziyyət muzakirə kardışone. Im, prezidenton de Suriya problemi əlağədar dəvuniə 5-minə sammit be.

Bə “Tasnim Nevvs”i istinadən “İran.ru” sayt xəbə dodə ki, ım tədbiri qardıədə Prezident Ruhani de Prezident Putini vindemon dəvunəşe. Ruhani məxsusi ğeyd kardəşe ki, İroni de Rusiya miyonə əlağəon hiç vaxt ım ğədər sıft və barzə səviyyədə bıə ni. Ticarətədə milli valyutaku istifadə şe-şe ziyod bedə, hərbi və atom sahədən İron və Rusiya arədə çokə əlağəon mevcudin.”

Ankara sammitədə 3 qılə devləti Prezidenton bahəm bəyannamə elan kardışone. Im sənədədə votə bedə ki,  tərəfon Suriyadə çe ımsornə 14 fevral Soçi vindemoni bəpeş  bə əməl omə vəziyyət muzakirə kardışone, bə Suriya Ərəbiə Respublika suverenəti, vəhdət və əraziə dırıstəti , həmən bə İMT Nizamnamə ıştə hurmət ifadə kardışone, həmən ğeyd kardışone ki, həmə tərəfon, har vırədə bəpe ım prinsipon danırışton. Tərəfon həmən bə Suriya Holan barzəyon işğali məhkum kardə İMT Əmniyyətə Şura 497-minə ğətnamə əməl karde zərurət təsdığ, demiən çe AİŞ Suriya ım ərazi barədə ğərar məhkum kardışone.

Çe Suriya şimali-şərğ məntəğəonədə vəziyyət muzakirə kardə bəpeş bə ğəror omin ki, çıvırey mışğılon Suriya ərazi dırıstəti və suverenəti çərçivədə həll bənine, tərəfon bı roədə bahəm hərəkəton bəkarden.

İdlib məntəğədə vəziyyəti hartərəfinə təhlili bəpeş bə ğəror omin ki, bə 2018-minə sori 17 sentyabr Məramnamə muvafiğ fəaliyyət nişon bıdon. Tərəfon ım məntəğədə “Hayat təhrir aş-Şam” terrorə quruhi fəaliyyəti intişar peydo kardeku ıştə norohəti izhar kardışone, təsdığ kardışone ki, de DAİŞ, “Cəbhət an-Nusra”, “Əl-Ğaidə” və həniən co terrorə təşkilaton əlağədar quruhon ləğv karde ro ıştə həmkarəti dəvom bəkarden.

Tərəfon İraq və livani Astana formati tərkibədə bənə muşahidəkaron iştirak bəqəm kardışone, bə ğəror omin ki, peşonə 3 tərəfinə sammit bə İron İslamə Respublika prezident Həsən Ruhani dəvəti muvafiğ İronədə dəvuniə bıbo.