Suriyə oxonə vəziyətiku xəbəon; muğavimət cəhbə səbarzətion dəvom kardedə.
Suriyə ərtış ğıvvon muvəffəğə əməliyaton dəvomədə 2 qılə co mikrorəyon iyən di Suriyə şimol ğərbədə terroriston dastiku ozod be.
Bə Mehr aqentiyəti raporti əsos, Hələb şəhri ətrofədə bıə Zitan stratejikə məntəğə həm zinə Suriyə ərtış iyən terroriston şiddətinə daveon meydon be ki nəticədə Suriyə hərbiçiyon muvəffəğəti sə be.
Terroriston ki ijən zinə bə Suriyə Əlzəhra nomo bıə muhimmə məntəğə həmlə karde ğəsdış be ijən de Suriyə hərbiçiyon muğaviməti məğlub bin.
Əmmo Suriyədə Tırkiyə be ğanunə hərəkəton dəvom karedə.
Xəbə ome Tırkiyə ərtış ğıvvon ijən şimol məntəğədə tələfotışon do və çəvon hərbiçiyonku 4 nəfər Edlebədə həlok bin.
Im qılə holədəy ki bə Suriyə sərhəddon tərəf Tırkiyə hərbi təchicaton vığande dəvom kardedə.
Əmmo Suriyəku co qılə xəbə həm ome ki İroni telerədio təşkilati ərəbə kanalon yəni Əlkosər və Əlaləm şəbəkəonku 4 qılə jurnaliston və fotoqraf ki Suriyə Hələbədə ko karde holədə bin terroriston nomerd və be ğanunə həmlə nəticədə zinə zəxmin bıən.
