Bə 8000 nəfər nezi İronədə koronavirusi noxəşonku çok bin.

İroni səhiyyə vəzarətxonə elanış karde ki detosə bə ısət, bə 8000 nəfər nezi İronədə koronavirusi qətə kəsonku çok bin.

Bə oxonə raporti əsos detosə bə ısət 20610 nəfər İronədə koronavirusi qəteşone ki çəvonku 1556 nəfər mardən.

İronədə əmmo de koronavirusi mubarizə barde dəvomədə xəbə ome ki mıbtəlo bıə kəson çı səlomət cəmiyətiku co karde məxsusə plani çərçivədə 30 milyon nəfər İronədə kontrol bıdən.

İroni prezident həm zinə səhiyyə və səlomət prinsipon rioyət karde xoto İroni millətiku ğədrdontiş karde və votışe: İronədə de koronavirusi mubarizə barde barədə statsika və raporton çok iyən umidvarəkəy.

Həsən Ruhani təkidış karde ki İroni millət hukəma de həmdeləti və səmimiyəti ım bıhrani məğlub bəkay.

Xəbə ome ki humanitarə koməkon çərçivədə Fransəku be sərhədə doktoronku i minə qrup bə İron varid bıdən; çandə təyeb təchizat və səhiyyə imkanaton de həm heyəti bə i co bə İron varid bıdə.

Əmmo xəbəon İronədə qıləy məxsusə damoni soxteyku hikayət kardedə ki korona qətekəson mualicə kardedə.

Im damon ki Çinədə bıə imtevononku bəpeştə çəy əsli madon bə İron varid be, ome rujonədə İronədə həm soxte və bə noxəşon doe bəbe.

Im damoni muvəffəğ iyən təsirinə nəticəon Çinədə təsdiğ bıə.