Koronavirusi pandemiya dınyo keşvəronış etənə.

Dınyoədə bə koronavirusə mərəzi mubtəlo bıə noxəşinon miğdar 1 milyon nimisən dəvardə. Çəvonədə tosə 300 həzo nəfər çok bıə, tosə 90 həzo isə vəfot kardəşone.

Isət ım epidemiya ən vey tiğonə vırə Amerika İbə Ştatonin. Əyo 430 həzo odəm bə ım noxəşi məruz mandə, çəvonədə 14 həzo kəs mardə, 23 həzo isə şifo peydo kardəşe. Britaniyadən vəziyyət rujbəruj qıvonin bedə. İyo ım virusə noxəşinon miğdar 60 həzo, mardəkəson isə 7 həzo kəse. Sər Vəzir Boris Consonən noxəşinon restədəy. Fransadən vəziyyət eyiən ım curəy. Çəvrey Səhiyyə departamenti sərdar Jerom Salomon`i məlumat doəşe ki, məmlkətədə vəfat kardəkəson miğdar 10 həzo nəfərisən dəvardə. Səudiyyə Ərəbıstoni krali xeyzonən bə ım mərəzi mubtəlo bıə. “Nur-az.com” sayti bə “Nyu York Tayms” rujnomə əsasən doə xəbədə nuşon doə bedə ki, çe ım devləti krali ailə 150 nəfər uzv de COVİD-19 virusi  noxəş qıniən.

Koronavirusi mərəz de bə Somaliən şə-beşə. Paytaxt Moqadişoədə 58 sinninə merd ım məmləkətədə çe korona mərəziku tələf bıə iminə noxəşine. Əyo jıqo noxəşinon miğdar isə hələ ki cəmi 12 nəfəre.

Az.R-ədən ım pandemiya vəy se hələ ki, mumkun bedəni. Cəlilobod şəhəri mərkəzi mərizxonə Şəmsəddin nomədə doktori bə “Azadlıq.info” sayti xəbə doəşe ki, çəvon mərizxonədə bə karantinə noxəşinon xidmət kardə şəfğətə hovəon bə ım virusi mubtəlo bıən.

Umumdınyo Səhiyyə Təşkilati sərdar Tedros Adhanom  Tramp dəvət kardışe ki, ce ım mərəziku bo siyasi məğsədi istifadə nıkardo. Dınyo devləton həmə bəpe bə ım xəto əleyh i bıbon ey dəf bıkon. Əks təğdirədə tələfati miğdar həddo ziyod bəbe.