Koronavirusə epidemiya bə kam bedə.

Haliyədə çe koronavirusə pandemeya tiğonə vırə Amerika İbə Ştatone. Əyo bı ım mərəzi mubtəlo bıə odəmon miğdar nimə milyonisən dəvardə. Yolə Britaniyadən vəziyyət hələ ki, qıvonin mandedə.

Rusiyadən noxəşinon rujbəruj ziyod bedə. İyo həvo temperatur de miyonə hisobi +3 dərəcəku tosə +12 dərəcəy. Mutəxəssison fikir jıqoe ki, ım bo koronovirusi pevolo be ro ən optimal həvosəte. İspaniyadə ısət hərarət tosə +22 dərəcə ros bıə. Əyo, həmən İtaliyadə bə ım virusi mubtəlo bıəkəson miğdar şe-şe kam bedə. Cinədən ki, pandemiya çəğono bino bıəbe, vəziyyət tədricən bə səhmon eqınidə, ictimai-iğtisadi jimon bəştə omedə. Isət bı məmləkətədən həvo temperatur +20 +28 dərəcə ğədərədəy.

Meydan TV çe Con Hopkins Universiteti tərtib kardə koronovirusi dınyo xəritə həxədə qıley məğalə dərc kardəşe. Im xəritə bə mutəxəssison jıqo qıley nəticə bekarde əsos dodə ki, tempraturi barz bıə vırədə virusi sirayət karde ehtimal kam bedə. Bərəks, tempratur tosə +4 dərəcə saru eqıniədə virusi fəaliyyət tiğon kardedə.  

Alimon postsovet devlətonədə pandemiya səviyyə saru be səbəbi Sovet hokuməti vaxtonədə əhali bə silə noxəşi əleyh icbari peyvənd kardeədə vindedən. Ğərbi digər məmləkətonədə ım peyvəndi dənıvunie bə koronovirusi muğaviməti zəif bıe bənə qıley səbəbi zınedən. Bənə Afrika, Cənub-Şərği Asiya, Hindistani qamə reqiononədə ki, həmonə peyvənd jə bıəni, əmo pandemiya səviyyə xeyli sarue, səhiyyə alimon çimi səbəbi məhz qamə həvo amiliku vindedən.

Boku hokumət isə məmləkətədə karantinə rejimi dəvom kardovnie fikirədəy. “İslamazeri.com” sayti bı barədə Vəziron Kabineti tono Operativ Ğərərqohi brifinqədə Tibbi Ərazi Təşkilaton İbemoni sədr Ramin Bayramlı sıxanon bə əhandon rosniəşe. Ey votəşe ki, məmləkətədə koronavirusi vəziyyəti analiz nişon dodə ki, bə karantinə rejimi dəvom karde ehtiyac heste.