Xətibzodə: Vyana muzakironədə İroni nəzə həmmə sanksiyaon peqəteye.

İroni xarıci vəzorətxonə sıxanəvot ımruj votışe: 2231 ğətnomə jintonədə Amerkə həmmə anti İron sanksiyaon peqəte çəmə rəsmi siyasətonin və əmə muzakirə bənav bardeyro təcil nibəkamon, ım məcmuə sanksiyaon bəpe bə i kərə ləğv bıbu, jəğo ki İroni tərəfo çəy imtivon karde ğəti bıbu.

Səid Xətibzodə bə Fars dıyo hamsuyə kişvəron İroni xarıci vəziri səfər işarəş karde və votışe: ım səfər bə Viyanaədə bıə muzakiron rəbtış ni, zərifi səfər çı Rəməzan diplomatiya çərçivədəy.

Xətibzodə İron və Amerkə miyono məhbuson vırə bə vırə kardey barədə həm votışe ki ım məsələ qıləy insoni məsələy ki ətom sazışi çərçivədəy.

İroni xarıci vəzorətxonə Əfğanistoni təhəvvolaton barədə votışe: Əfğanistoni şərayet əməni niqəronış karde, boçi ki əmə çı Əfğanistoni sulh və stabileti bidəmone.

İroni xarıci vəzorətxonə sıxanəvot İron və Ərəbistoni miyono ehtimoli muzakiron barədə həm votışe: İron həmmişə bo harcurnə muzakirə və votımoniro hozzıe, hətto de Ərəbistoni.

Səid Xətibzodə , çı İnqiltərə rəsmi şəxson tojə sohbəton, qələy məhbusi ozodəti barədə votışe: ım məsələ barədə çəmə iyən inqiltərə miyono huğuği votımonon əncom bə ni və İroni məhkəmə çəy barədə nəzə bədoy.