Tırkiyə iyən sionist rejimi əloğəonədə tojə fəsl oj be.

Rəcəb Təyyeb Ərdoğan bə sionist rejimi canq tojə vəziri zanqəş karde iyən bə Telaviv-Ankara miyono əloğəon inkişofi təkid karde kənoədə həminə həmkarionış bo miyonə şərğ məntəğə muhim bə hisobış varde.

Bə Anadoli aqentiyəti raporti əsos, Tırkiyə prezident bə sionist rejimi canq tojə vəziri zanqış karde və çəy vıjniyey təbrik vote kənoədə təkidış karde ki bo Miyonə şərğ məntəğədə stabileti iyən əmniyəti icod kardeyro Tırkiyə və sionist rejimi miyono bıə əloğəon çoknə bey muhimme.

Ərdoğan həminə rabitədə təsdiğış karde ki de həmməy mıvcud ixtilafon Trkiyə iyən sionist rejimi miyono bıə votımonon və rabitəon vey muhimmin.

Əv əlovəş karde: Tırkiyə və israil muxtəlif baxşon əcumlə enerji, turizm iyən texnoloqiya baxşonədə bo əloğəon inkişofiro zərfiyətşon heste.

Həminə təmas və telefoni rabitə qıle holədə be ki bə statestikaon və parsımonon əsos Tırkiyə millə çı Ankara-Telaviv əloğəon inkişofiku vey norohətin.

Telaviviku amerkə səfarətxonə bə Şərifə ğudsi ovoştoniye iyən Ğəzzədə sionist rejimi cinoyəton əcumlə mıvzoonin ki Ankara-Telavivi miyono ixtilafon bois bıə.