De Amerkə sərostə muzakirə karde tale məlum ni.
İroni xarıci vəzir de Amerkə sərostə muzakirə və mıstəğimə votımoni barədə votışe: jığonə muzakiron tale oşko ni və əqə çəyku nəticə hosil nıbu bə muzakirə ehtiyoc ni.
Bə İran Press aqentiyəti raporti əsos, Huseyn Əmirəbdullahiyan tojədən çı Munheni əmniyəti iclosi kənoədə bə jurnaliston votışe: Amerkə tojədən vey kərə İroniku tələbış kardə ki boəmon mizi səpe sərost muzakirə kəmon ki əmə həm bəy ciddi reaksiya nışo doəmone ki jığonə muzakiron tale oşko ni və əqə çəyku nəticə hosil nıbu bə muzakirə ehtiyoc ni.
İroni Xarıci vəzir əlovəş karde: əqə Amerkə qıləy çokə ko və təşəbbusi bənə sanksiyaon ibaxşi peqəte ko əncom bıdə peşo bə Vaşinqtoni çokə niyyəti xatircəm mande bəbe çən jığo vote bıdə ki ısət çı Amerkə əməl-rəftori faxt heste.
Huseyn Əmirəbdullahiyan əlovəş karde ki məsələn Amerkə karde bəzne çı İroni 10 milyord dollar boloka bıə pulon ozod bıkə ta əmələdə çəy çokə niyyəti bıvindəmon.
İroni Xarıci vəzir votışe: Amerkə fəğət zıvonədə ıştəniku çokə niyyəti iddio nışo doydə ki ın bo muzakirə dəvom ya xod bə nəticə dast peydo karde kifoyət kardə ni.
Huseyn Əmirəbdullahiyan həçenin bə de muzakiron həmzəman çı Co Baydeni dıvləti tərəfo anti İron tojə sanksiyaon tətbiği işorəş karde və votışe: ın məsələ nışo doydə ki quya Baydeni dıvlət həm bənə Trampi dıvlət əməl kardeydə.
