Həmid Nuri barədə İsveçi məhkəmə hıkm, İroni tərəfo məhkum bıə.
İroni xarıci vəzarətxonə sıxənəvot, İronıjə şahrvand Həmid Nuri barədə çı İsveçi məhkəmə hıkmi, de şiddəti məhkumış kardə.
Hicri şəmsi 1398 minnə sori Abanə manqi 18 minnə rujədə, (Miladi 2019 minnə sorədə Noyabrə manqi 9 minnə ruj) Həmid Nuri bə ıştə kinə problemon həlliro bə İsveç şə be ki de ım kişvəri əmniyyəti hərbion vositə dastqir bıə və təğribən 32 manq bəbe ki zindonədəy..
İsveç məhkəmə tərəfo, Nuri mıttəhəm bıə ki İronədə 34 sor çımi bənav iddio bıə hodisəonədə mıdoxiləş be, ın iddio şikoyətəkəyon veyni mınofiğon terroristiyə qrupi uzvonin.
Həminə mıddətədə ki Nuri zindonədə həbs be, əlovə bə ım ki karserədə məhbus be, dırozə zəmononədə deştə ailə həm rabitəş nıbe. dəvardə 2 haftədə ki deştə ailə rabitəş be, təkidış kardə ki həmçınan karserədəy iyən de ım vıcud ki vindeyero de vey muşkilaton dim bə dime əmmo çəşə kəhimiku istifodə kardey həxış ni.
Zinə pencşənbə, İsveçi məhlkəmə bə mınofiğon terroristiyə qruponi tərəfo jıə ittihamon himoyə kardey çərçivədə, Nuri bə həbse əbəd məhkumış kardə.
Həminə cəhətədə və bə Fars aqentiyəti raporti əsos, zinə İroni xarıci vəzarətxonə sıxənəvot, Nasır Kənani Çafi, bə İsveçi məhkəmə hıkmi reaksiya nışoş do iyən votışe: həminə hıkmədə, vindey bıdə çi, ıme ki İsveçi ədliyə sistem, terroristiyə qrupi fəaliyəti icozə doey iyən ıştə beynəlxalğə məsuliyəti rioyət nıkardey barədə bə İroni milləti cəvob doey əvəzi, oşko surət terrorizmiku himoyətış kardə.
Kənani Çafi ıştə sıhbəton dəvomədə votışe: İron İslam Respublikaro komilən etığadışe ki Həmid Nuri hıkm fəğət siyosiyə hərəkətiro qıləy bəhonəe, həmonə siyosiyə hərəkət ki hiç həğiği və huğuğiyə faktış ni.
İroni xarıci vəzarətxonə sıxənəvot, ijən təsdiğış karde: ımruj Stokholmədə mınofiğon qrupi tərəfo cəfənqiyot, çəvon təziğ iyən məhkəmə kənoədə deşmənon mediyaon qılrd nışoş do ki əvon fəğət pidəşon be ki ıştə nəzə bə İsveçi ədliyə icbor kon ki həminə barədə həm muvvəffğə bin və İsveçi məhkəmə sistem həm ım koy əncomış do.
İroni xarıci vəzarətxonə sıxənəvot, ıştə sıxənon oxoədə təkidış karde: İron İslam Respublika Həmid Nuri barədə, İsveçi məhkəmə hıkmi, ğəye ğanuni və botil zıneydə və əlovə bə şiddətinə etırozi bəyon karde, əy bə 2 qılə kişvəri 2 tərəfiyə rabitəon zərəl-ziyon varid kardeyro İsvaç kişvəri məsul zıneydə.
