Əmirəbdullahiyan: hiç şəroyetədə, milləti həx huğuğiku dast nibəkəşemon.

İroni xarıci vəzir işorəş karde ki bə Amerkə vığandə cəvobi diyə kardey holədəmon, ijən votışe: bə qıləy zumand və stabilə təvafuğ rəseyro, ciddi iyən həğiğiyə irodə soybimon, əmmo hiç şəroyetədə, milləti həx-huğuğiku dast nibəkəşemon.

Dəvardə çoşəmbə şəv, İroni xarıci vəzarətxonə sıxənəvot Nasır Kənani xəbəş doə be ki sanksiyaon peqətey muzakirəonədə mandə mıvzoon həlliro Amerkə dıvlət bə İron İslam Respublika fikon iyən ideon cəvob doşe, Əv ijən əlovəş karde: bə Amerkə tərəfi fikon iyən ideon diğğət kardey holədəmon iyən ım ideon diğğət kardey bəpeşt, İron İslam Respublika ıştən fikon və ideon bə həmohənqəkə elan bəkarde.

Bə Fars aqentiyəti raporti əsos, zinə şəv İroni xarıci vəzir, Huseyn ƏmirƏbdullahiyan de İ Bıə Milləton Təşkilati sərkatib, Antoniyo Qotreşi telefoniyə votımoni bəpeşt, ıştə instaqrami səhifədə nıvıştəşe: həminə telefoniyə votımonədə, dınyo iyən beynəlxalğə baxşədə mıştərəkə cəhdon mıvzoonku əcumlə atomiyə silohon hevujətiku vəy qətey muğavilə onımon iyən sanksiyaon peqətey muzakirəon prossesi oxonə vəziyəti barədə diğğət bıə.

İroni Xarıci vəzir həmçınin əlovəş karde: NPT iclosədə bə həmmə fikon diğğət kardey zərrurəti barədə bə İ Bıə Milləton Təşkilati sərkatibi cəvobədə bəy vey ğoymə surətədə votəm ki NPT nakonə onemoni yol, de Miladi 1995, 2000 və 2010 minnə sori onemonon təvafuğon rioyət nıkardey vositə həmmə nakonə onemonon nəticəon bə kəno noşe və ğoymə surətədə ım məsələ İroniro ğəbul kardənin ni.

Əcumlə ım məsələon, Asiya ğərb məntəğə barədə be ki həmişə NPT nakonə onemoni yol pidəş be sionist rejimi bənə NPT uzv bıbu.

Əv ijən əlovəş karde: təyin bıə ki de İ Bıə Milləton Təşkilati sərkatibi vositə ım məsələ diğğət bıbu.