Pars Today

İroni xarıci vəzarətxanə huğuği və beynəl xalğ məsələon muavin ətomiyə təvafuği tale barədə iron və Rusiyə miyono muzakirəonku xəbəş do.

Seyd Əbbas İrağçi Cenevrədə bıə i bıə milləton təşkilati insonə həxon şura iclosi kənoədə bə Sputink aqentiyəti votışe: Tehron və Rusiyə miyono muzakirəon əncom bey holədəy ki bə çəy əsos və de Amerkə tojə dıvləti siyasəton diğğəti məxsusən de Trampi vıjniye bəpeştə ətomiyə təvafuği tale təyin bıbu.

İrağçi bə İron və Rusiyə miyono həmmə sahəonədə muzakirəon dəvoniyə işorəş kardə və votışe: həminə votımonədə ətomiyə təvafuği muxtəlifə hisəon barədə məxsusən de Amerkə tojə ğəraron bərobər çın təvafuği ləğv əkə hərəkəton barədə suhbət və muzakirə be.

İroni xarıci vəzarətxanə muavin həminə mısohibə co baxşədə təkidış kardə: İron və Amerkə miyono 2 tərəfiyə rabitə və muzakirəon bərğəror karde imkonış ni.

İrağçi həmçınin votışe: əqə ğəror bıbu ujnən İron və Amerkə miyono əloğəoni icod  bıbu ətomiyə təvafuği barədə və koşınason səthədə çı ətomiyə təvafuği mıştərəkə kamissiya çərçivədə bəbe.

Amerkə tojə prezident Donald Tramp çand kərə bə İroni zidd deşmənçiyə sıxənon bəyon karde çərçivədə ətomiyə təvafuğiku tənğidış kardə ijən pidəş be de İron ujnən muzakirə və təvafuğ bıbu.