Rəyisi: Amerkə, Təkfiri qrupon icodış kardə
Zinə əsrədə, İron İslom Respublika prezident bə Çin kişvəri ıştə 2minnə səfəri cərəyonədə de Pekin şəhri Donq Si torixiyə məçitədə iştiroki de bəzi mısılmonon vindemon iyən çəvon cəmədə nıtğış kardə.
Bə İran Peres aqentiyəti raporti əsos, Çoşəmbə əsrədə, İroni prezident, Seyd İbreym Rəyisi, bə Çin kişvəri ıştə 2minnə səfəri cərəyonədə de Pekin şəhri Donq Si torixiyə məçitədə iştirokış kardə iyən votışe: ım şəhri mısılmonon və nımoj votə kəson cəmədə vey xuşhalim, Rəyisi ijən bə Çinədə 1 həzoku vey İslom dini stajış nıbıə işorə iyən əlovəş kardə: 2 həzo çımiku bənav əbrişəmi caddə, İron və Çini 2 qılə yolə sivilizasiya bə yande dəçokney bois bıə be.
Həminə vindemonədəə İroni Prezident ijən votışe: İslomiyə İnğilobi əvvələ soronku tosə bə ısət, har 6 manq i kərə, Amerkə İroni İnğilobi oxo elanış kardey holədəy əmmo İron İslom Respublika ıştə 44 minnə səbarzəti şoə mərosim həm bərpoş kardə.
Rəyisi ijən təsdiğış kardə: Amerkə de Təkfiri qrupon icod kardey vositə, İron və co qılə islomiyə kişvəronədə noəmni icod kardey holədə be.
Prezident ijən əlovəş kardə: Amerkəvıjon iyən sultə nizom bıznən ki vəomeyədə, dınyoədə sultə tələbətiro hiç qılə vırəşon ni. əmə bovəmon heste ki de koon isloh bey umu, dınyo vəziyət bə xəy iyən poki səmt hərəkət bəkarde.
