İslomi İnğilobi Yolə Rəhbər: Həcc, beynəlxalğə vədəqo iyən mıjdəvonətie

İslomi İnğilobi Yolə Rəhbər, həcci fərizə koəkəyon vindemonədə təkidış kardə: Həc, de dınyo və axırəti veyə mənafe bıə beynəlxalğə vədəqo iyən mıjdəvonətie.

Çoşəmbə, İslomi İnğilobi Yolə Rəhbər, Həzrəte Ayətullah Xamenei de kali çı Beytullahel Hromi rəsmi şəxson, koəkəyon iyən zayiron vindemonədə bə həcc səhihə diyə və bə ım fərizə vey muhimmə dərəse və famemoni, vey muhimm zınəş be və təkidış kardə: Həc, qıləy qlobal və sivilizasiya cəhəto məsələy ki çəy hədəf, zılm və istikbor, bəşəri və ğeyri bəşəri buton vədə, çı islomi umməti inkişof, mısılmonon dılon bə yande nez kardey iyən islomi umməti miyono vəhdət icod kardeye.

Bə İroni Yolə Rəhbəri məlumat ərosnə mərkəzi raporti əsos, Həzrəte Ayətullah Xamenei bə ım yolə fərizə dınyo və axırəti mənafe işorəş kardə və hamiyəşe: ehanə həc nıbu, islomi ummət həm məhv bəbe.

İslomi İnğilobi Yolə Rəhbər, İslomi umməti vəhdət və de mıstəkbirə şəytonon mubarizə bardey əcumlə ım hədəfon zınəş be və əlovəş kardə: çı Həci dunyəvi veyə mənafeku ıme ki ım yolə ictimaədə mısılmonon, çı sionist rejim və istikbori ğudrəton nıfuzi vədə, ıştə iştirok iyən zumandəti elan və dınyo zalımon vədə ıştə sinə sipər bıkon.

Həzrəte Ayətullah Xameni ijən bə dınyo məsələon iyən çı mısılmonə milləton vəziyətiku xəbədo bey zərurəti işorə və əlovəş kardə: Həcci rujon de beynəlxalğ məsələon və milləton həğiği surət oşno beyro, vey çokə fırsəte ta duəvujə aqentiyətion iyən mediyaon duə xəbəon, çı dınyo həğiğəton ku insoni diyəro və qimro nıkon.

İslomi İnğilobi Yolə Rəhbər, dınyoku bexəbə bey har ictimaiyəti həlok bey bois zınəşe be və əlovəş kardə: həmmə milləton və rəsmi şəxson bəpe çı deşmoni hədəfon, metodon, siyosəton və çəvon zumand iyən zəifə noğtəon zıney kumil surəti ciddi bıqəton.

Həzrəte Ayətullah Xamenei ijən əlovəş kardə: ehanə bə qlobal məsələon diğğət kəmon, karde bəznımon çl deşmoni həğiği hədəf və bə kali məsələon çəy isrori dərk kəmon, jəğo ki vey məsələonə barədə, rəsmi şəxson dəğiğ mandin və səhih əməl kardışone ki çəy nəticə ım be ki məntəğə və beynəlxalğə məsələonədə İroni vey çokə inkişofon çı Amerkə ğeyzin bey bois bıə.

İslomi İnğilobi Yolə Rəhbər ijən əlovəş kardə: sivilizasiya iddio kardə kişvəron ki həğiğətən sivilizasiyku bu bardə nin, sənibəton siyoh və sıpiyə irğ ya xot Avropa iyən ğeyri Avropa irği məsələonədə qiriftorin, və insonon əvəzi boştə kə həyvonon, veyə erj iyən əhəmiyyəti zıneydən ki dıyoədə mıhociron iyən miqranton vey kərə ğərğ bey m həğiğətiku qıləy nışonəy.