Məçituləğsa tojədən be ehtıroməti kardey İroni tərəfo məhkum bıə

İroni xarıci vəzorətxonə sıxənəvot Nasır Kənani bə Məçituləğsa be ehtıroməti kardey, bə Ğəzzə ğəhrəmonə muğaviməti vədə məğlubiyəti, sioniston reaksiya zınəşe və ım hərəkəti məhkumış kardə.

Pencşəmbə şəvədə, de boydəği aksiya bino bey həmzəmon, çand sa sionist rejimi qədə şəhron sakin bıə kəson de Ğudsi işğolçiyə hərbiçion himoyə jintonədə, bə Məçituəğsa  səhnon həmlə kardışone.

Bə Məçituləğsa sioniston həmlə, sionist rejimi cəhdon çərçivədə və Beytul muğəddəsi vırə və zəmoni təğsim kardey planon icbor kardeyro və de boydəği aksiya bərpo bey həmzəmon əncom bıə.

Bə İrna raporti əsos, Cımə şəvədə Nasır Kənani ıştə Tıvittədə nıvıştəşe: de sioniston vositə, bə Məçituləğsa be ehtıroməti kardey və bə Fələstinıjon və mısılmonon ələyh irğçiyə şuaron doey, Ğəzzə ğəhrəmonəti muğaviməti vədə bevəcə məğlubiyəte və məhkume.

Əv ijən əlovəş kardə: Aya beynəlxalğə ictima həni bə sionist rejimi apartaydi zot, şək-şobhəş heste.

Dəvardə Seşəmbə rujədə sionist rejimi ğırəkə təyyorəon bə Ğəzzə tanqə həmlə kardışone ki çəy dumoədə çand da Fələstinıjon əcumlə 3 nəfər İslomi cihodi hərəkəti ali komandir, çand nəfər jen və hırdən şəhid və çand nəfər həm zəxmin bıən.

Im həmlə bəpeşt, bə sionist qədə şəhron ələyh muğaviməti rəketi həmləonku hevujə həmləon əncom bıə ki nəhayətədə bois bıə ki sionist rejim bə otəş basti təvafuğ rozi bıbu.