Xordad manqi 15, İmom Xomeyni tarixiyə ğiyomi sorəqardışe.

Imruj dışanbə xordad manqi 15 miladi 2023 minnə sori İyoni 5 mərhum İmom Xomeyni tarixiyə ğiyomi sorəqardışe.

Hicri şəmsi 1342 nə sori xordad manqi 15 minnə ruj islamiyə inğilabi tarix və İroni milləti islamiyə inğilabi binovrədə qıləy muhim muğəddəmə hərəkət be.

Pəhləvi rejimi məmuron 57 sor çimi bə nav Xordad manqi 15 minnə ruji və Ğomı Feyziyə mədrəsədə mərhum İmom Xomeyni ifşa əkə sıxanon bəpeşt bə ım mığəddəsə şəhrədə bıə İmom Xomeyni kə hucum və əy dastqir kardeşone.

İmom Xomeyni, Aşoraye Huseyni ruji Ğomı Feyziyə mədrəsədə ıştə zumandə qəponədə pəhləvi rejimi cinayəton və şah de israil rejimi rabitonış oşko kardəş be.

İmom Xomeyni qəte bəpeştə İroni muxtəlif şəhronədə anti şah rjimi eteraz aksiyaon hevuj surəti bino bıə.

Milləti tərəfo ım etirazinə hərəkəton bəpeştə, rejimi əmniyətiyə təşkilati məmuron bə Ğomı feyziyə mədrəsə vəhşiyə hucumi cərəyonədə millətiku xəylion şəhid, zəxmin iyən dastqir kardeşone.

De ım tarixiyə ğiyam, pəhləvi zılminə rejimi vədə islamiyə hərəkati dim bə dim ome bino be və islamiyə inğilabi fiki, siyasi və ictimaiyyəti əğidəvi məsəlon təşkil doero çokə şərayetış icod karde.

İroni islamiyə Respublika təsis əkə mərhum İmom Xomeyni hicri şəmsi 1342 nə sori xordad manqi 15 minnə rujədə bə şah rejimi zılminə hokoməti zidd bıə siyasi ğiyomi bə qıləy muhimmə mərhələ rosnişe, jəğo ki 10 sori mıddətdə xəyli saxtion mincumlə məmləkətiku bə xaric dər bə dər bey tov vardeşe.

Mərhum İmom Xomeyni ğiyam 1963 nə sori əvvəliku bino be və 1979 nə sori, de İroni İslamiyə inğilabi bə səbarzəti rəsə.

Jığo votı bıdə ki Xordad manqi 15 minnə ruji ğiyom ım islamiyə nizomi səbarzətiədə oşko və ruşinə rolış ifa kardə.