Qeneral Bağıri: dınyo hərbi ğudrəton, İroni mudafiə muvəffəğiyəton dumoədən
Silohinə ğıvvon həmmə ğərorqoh yol, bə mudafiə sənaye ruji dəme mınosibəti xoto, qıləy mesaj ğolibədə təkidış kardə: dınyo hərbi ğudrəton, İroni mudafiə muvəffəğiyəton dumoədən.
Bə İran Peres aqentiyəti raporti əsos, silohinə ğıvvon həmmə ğərorqoh yol, qeneral Muhəmməd Bağıri qıləy mesaj ğolibədə təkidış kardə: muxtəlifə baxşonədə İron İslom Respublika mudafiə zumandəti muxtəlifə baxşon ofəyəşe ki hətto dınyo yolə hərbi ğudrəton həm karde zınəşon nıbe əvon xəlğ bıko.
Qeneral Bağıri bə silohinə ğıvvon mudafiə iyən himoyə vəzir qeneral Muhəmməd Rıza Aştiyani xitob Mordadə manqi 31 minnə ruj yəni mudafiə sənaye ruji dəme mınosibəti təbrik votışe.
Im mesajədə omə: ımruj dınyo etırofış kardə ki zəmini, dıyo, həvo, ayrokasmik, rəket, dıron iyən kiberi və suni intellekt baxşonədə İron fəğət xarıci nəmunəonku xəlğ kardey əzı ni bəlkəm ım baxşonədə tojə iyən muxtəlifə koon xəlğış kardə ki hətto dınyo yolə hərbi ğudrəton həm bə ım məsələ cəzb bıən və ım muvəffəğiyəton istifodə kardey dumoədən.
Im mesajədə ijən omə: ımruj kişvəri mudafiə sənaye baxşədə inkişofon iyən zumandətiyə inğilob, jəqoe ki dınyo səthədə əzəmətin, mudafiə, iğtidorin iyən bə texnoloqiya inkişofon əsose.
