Əmir Əbdullahiyan:sionist rejim Ğəzzədə genosid kardedə

Əmir Əbdullahiyan:sionist rejim Ğəzzədə genosid kardedə

.İron İslom Respublikə xarici koon vəzir İMT Sər Assambleyə iclosədə votəşe ki,sionist rejim Ğəzzədə genosid kardedə.Fələstini mığovimət ğıvvon bə sioniston cinoyəton cəvobədə 7 oktyabr 2023-ə sori şənbə rujiku etiborən Ğəzzə tanqəku bə sionist rejimi işğal bıə əraziyonədə bıə mevğeyon ələyh "Ələğsa tufoni" əməliyyotışon bino karde.de Mığoviməti canqəvaron dimbədim omey iğtidorədə nıbə sionistə ləşkər çe əməliyyoti sıftəku Ğəzzədə jimoni məntəğəon, noxəşxonəon,dini mərkəzon və məktəbon dəvominə surətədə bombardımon kardedə.bə Fələstıni Səhiyyə Vəzorətxonə hisobati əsosən,sionist rejimi Ğəzzə tanqədə kardə cinoyəti 20 ruji dırozi 7800-sən veyə inson şəhid bıə,bə 20 həzo nezi inson həm zəxmin bıən.demi əloğədor və bə Fars xəbə agentəti məlumoti əsos,İron İslom Respublikə xarici koon vəzir Huseyn Əmir Əbdullahiyan zinə şəvi (pəncşambə) İMT Nyu-Yorkdə bıə mənzil-ğərorqoədə Fələstini problemon sahədə İMT Sər Assambleyə iclosədə,İroni bə sulh iyən sabitəti koməq kardeyədə bıə konstruktivə rolu işorə kardə holədə,de terrorizmi mıborizədə AİŞ və çandə qılə Avropa məmləkəton bə İsraili işğalçiyə rejimi dastəkış tənğıd kardə və votəşe:Əmniyyət Şurə sulhış təmin kardey zınəni.İroni xarici koon vəzir çe Ğəzzə bə təcili humanitarə koməqon niyozin bıey elonış kardə və votəşe:bə Beynəlxalğə ğanunon və Sər Assambleyə ğətnoməon əsos,Fələstini xalği bə işğali zidd mıborizə bardero ğanuni həxış heste.İroni diplomatik xıdməti rəhbəri ğeyd kardəşe ki, Əmniyyət Şurə çe Fələstini xalği tale mıəyyən kardey sahədə səyon beovandətiyədə Amerika əsosə amile.Fələstin sərzəmini mısılmınon,xristiyənon və yəhudiyon həm daxil bıə holədə,çəy bəçəy əslə sakinon ayid bıey elon kardə bildirən Huseyn Əmir Əbdullahiyan jıqo ın məsələş ruşin kardə:İron jıqo hisob kardedə ki, çe Fələstini iminə milləti miyono çəvon ıştə tale çe İMT-ədə ğeyd bıə ğaydədə mıəyyən kardeyro bəpe referendum dəvordıney bıbu.İroni xarici koon vəzir Huseyn Əmir Əbdullahiyan bə sionist rejimi ğərbi Asiyə regionədə cinoyəton işorə kardə holədə votəşe:ın rejim qırd cinoyəton,ə cimlə təcavuz,bə insoniyyəti əleyh cinoyəton və tuməbırış kardə və bə hiç qıləy ğanuni əməl kardedəni.İroni diplomatik servisi rəhbəri “Ələğsa tufoni" əməliyyotış bə Fələstini xalği zidd dəvom kardə təcavuz və bə sionist rejimi işğali reaksiyəş zıne və ğeydış karde ki, AİŞ-i bın mınoğişəonədə bilavositə iştirak və maliyyə və hərbi cəhəto bə israyili rejimi dastək İMT Nizomnomə darıştey mənoədəy.İroni diplomatik sistemi rəyisi həmçinin bə mılki insonon ələyh hoziyəti və genosidi dərhol oqətey və Ğəzzə milləti humanitarə koməqon vığandeyro İMT Sər Assambleyədə zumandə ğətnomə təsdığ kardeyış piyə.İron İslom Respublikə xarici koon vəzir Huseyn Əmir Əbdullahiyan çoşanbə ruji şəvi (de bumiyə vaxti) bə Nyu-York omə.