İslomi İnğilobi Yolə Rəhbər: səçın, çı təhəvvulati əsos və problemon hələkəy

İslomi İnğilobi Yolə Rəhbər İroni Kerman və Xuzıston ostanoni çand həzo nəfər milləti hərorətinə vindemonədə, Miladi 2024 minnə sori Martə manqi 1 minnə ruji səçıni, vey muhimm, təyinəkə, problemon hələkə və təhəvvulaton zəminə icodəkə bə hisobış varde.

Bə Rəhbəri Yolə məğomi təşkilati məlumatərosnə mərkəzi raporti əsos, Im vindemonədə Həzrəte Ayətullah Xamenei İslomi Respublikaədə səçıni mıntığ və əsli əhəmiyyəti təbyin kardeyədə hamyəşe: nizomi cumhuriyət və islamiyət bə səçın vabəstəy, boçi ki kişvəri mudiriyət kardeyədə, milləti hakımiyət, demokratiya və cumhuriyəti bə vırə rosniyeədə ğərəz səçıni bərpo kardey hiç qılə roy ni.

Həzrəte Ayətullah Xamenei səçıni nıbey, diktatori icod kardey illət ya noəmni və hərco mərc və iğtişoşi illət zınəşe və de tənğid bə əvoni ki de muxtəlifə şikilon milləti səçınədə iştirok kardeyro dılsard kardedə təsdiğış kardə: səçın fəğət həğiği və səhihə roye ki karde bəzne milləti milli hakımiyəti təmin bıko.

İnğilobi yolə Rəhbər ıştə sıxənon co qılə baxşədə bə Ğəzzə islomi və beynəlxalğə məsələ işorəş kardə iyən hamyəşe: ım hodisə 2 qılə cəhətiku mıslış nıbıə hodisəy, həm sionist rejimi səmtiku boçi ki hiç vaxt  bə ım miğdor, cinoyətkor, səffok, xunəhə, hırdənəkışt, xəbis, zalım və bə noxəşiyon və noxəşxonəon sənqər darıştə bomba şodoy vindey nıbıə, və həm Fələstini millət və mubarizəon səmtiku, boçi ki jıqo səbr, muğavimət və deşmoni divinə karde stajış nıbe.

Həzrəte Ayətullah Xamenei ijən təsdiğış kardə: de ım vıcud ki ov, xorək, damon və sutemon bə ım millət rəseydə ni əmmo əvom bənə band muğavimət kardışone ki ım təslim nıbey əvoni səbarz kardedə boçi ki Xıdovəna de səbrəkəyone ijən ki səbarzəti nışonəon ımruj vindey bıdə.

İnğilobi Yolə rəhbər, de muxtəlif və veyə imkanaton və təchizaton soy bey vıcudi, sionist rejimi zəifəti  ım canqi vey muhimmə co qılə cəhəton zınəşe və vey muhimmə nuktəon bəyon kardeyədə hamyəşe: ım hodisədə sionist rejimi məğlubiyət, Amerkə məğlubiyət həm bə hisob omeydə və ımruj dınyoədə hiç kəs sionist rejimi de Amerkə və İnqilisi miyonono hiç tafot zınəş ni və həmmə zıneydən ki ım kişvəron həmm bənə yande hestin.

Ə Həzrət otəşvəsiro və bombardımoni ğət kardeyro əmniyyət şura çand qılə ğətnomə veto kardey, Amerkə devləti behəyoə hərəkət və noxəşiyon, piyə odəmon, jen, hırdən və co qılə  be mudafiə milləti səpe bomba ekardeyro de sionist rejimi hamdastəti zınəşe və əlovəş kardə: bə muğavimət komək kardey həmmə kəson vəzifə, və bə sionist rejimi komək kardey cinoyət və xəyonət bə hisob omeydə.

Həzrəte Ayətullah Xamenei bə sionist rejimi nat, sutemon və əmtəə rəsey vəy qətey, islomi devləton vəzifə zınəşe, ım xəbisə rejim ki hətto bə Ğəzzə millət ov rəsey vəy qətəşone. Ə Həzrət ijən əlovəş kardə: ımruj dınyo vijdon bə dard omə. Amerkə və Avropaədə millət bə xiyabonon omeydən və çəvon kali siyosi şəxsiyəton, universiti rəyison və alimon sionist rejimiku bəştə devləton himoyə kardey xoto, etıroz kardedən əmmo de ım vıcud kali devləton həmçınan bə səffok rejimi ıştə koməkon dəvom dodən.

Həzrəte Ayətullah Xamenei ijən təkidış kardə: be şək səbarzəti de həxi cəhbəy və sionist rejim məhv bəbe və umumon heste şımə cıvonon ım hətmi vəomə deştə çəşi bıvindon.