Həzrəte Fatmə(s) nom iyən vəsfon

Həzrəte Fatmə(s) nom iyən vəsfon

Xıdo Rəsul(s) iyən çəy jimoni həmro Xədicə(s) çəşon Məkkə şəhrədə de qıləy qiromiyə fərzəndi nuroni təvəlludi ruşin be.Fatmə(s) çı Xıdo pəyğombəri(s) kinə iyən çe Xıdo xosə bandəonku qıləyni be.əmmo çə həzrəti jıqo qıləy ş`ən iyən əzəmətış hestebe ki,kamə insonon ə əzəməti dərk kardey bəzıneyn.çoko ki,çe həzrəte İmom Sadıği(ə) sıxanədə omə ki,hamyedə:”bərosti Fatmə Fatmə nom noey bıə.çıro ki,məxloğ əy dərk,famey iyən zıneyku ocizin”.

Liza çe bərnomə sıftədə etırof kardedəmon ki,çəmə zıvonon ə həzrəti vəsf kardeyku ocize və çəmə bəştə zıvon vardə çi ımon həmmə ayə və rəvoyətonin ki,çın kəromətinə banu həxədə çe Xıdo,İslomi pəyğombər(s) iyən Məsumə İmomon(ə) zıvononku nəğl bıə.Fatmə(s) məğam jıqo barz iyən bılınde ki,Xıdovənd de qıləy vey ğəşənqə tevsifi bəştə pəyğombəri(s) jıqo hamyedə:”İnna Ə`taynakəl-kəvsər.....əmə bətı Kovsər(ziyodə xeyr iyən bərəkət)əto kardemone.çən,(bə ın əto kardə bıə neməti xoto)nımoj bıhand iyən bəy vəsl bıbi və hejo çe təkbirətul-ehromi sıftətənə zəmonədə ki,bə nımoji daxil bıey dərvozəy, ğərəz Əv harçi heste ıştə peştono bahaşt(və bızın)beşək ıştı dışmen əbtər iyən Xıdo rəhmətiku bırniyə bıə”.

Bəle Xıdovənd bəştə xatəm iyən oxonə pəyğombəri(s) Kovsərış əto karde ki,çe Xıdo rəhmət iyən rəfət bə cuş omə çeşmə iyən honiye və fəğət dılon soybon iyən piyəkəson çın zulolə çeşməku sirob bıey bəzıneyn....təbrik...

“İsm” çe nışonə mənoədəy iyən ism noey inev bo mıəyyən kardero bıə qıləy nışonə noeye.”Ovsaf ya vəsfon”qıləy xısləte ki,fərdon deəy şehrətışon heste və məşhurin və adətən nomonədə çəvon ləğəbon inikas pəydu kardedə.ğədimə zəmonədə qahi zəmon bə fərdi şərofəti xoto boəy çandə qılə ləğəbon oko doydəbin.nom noey İlahi sınnət iyən adətonkuye.Xıdovənd bəçəmə pı Odəmi(ə) iyən bəçəmə inə Həvvo(ə) nomış noe.İlahi evliya veyni nom noey həm çe milləti miyono de ın rəvoc pəydu kardə şivə bə ico bıə.əmmo bə Ğıroni məlum kardey əsos Xıdovənd bənə həzrəte İsa(ə) bıə bəştə bəzi evliyaon jıqo hamyəşe:”(bə yod dənən) qıləy zəmon ki,firiştəon voteşone:”ha Məryəm ha! həyğətən,Xıdovənd bətı ıştə tərəfiyo de qıləy Məsih nomo bıə Məryəmi zoə İsa kəlmə iyən nışonə bəşorət doydə”.ın ko bəvon ehtırom noeysə əlovə,çəvon şəxsiyyət,əzəmət,imtiyozon iyən xısləton bəyon kardedə.həzrəte Fatməye-Zəhro(s) həm çe nom iyən ləğəbon soyb be ki,çəvon kali qıləyni Xıdovənde-Mıtəoli təyinış kardə və bəzi qıləyniyon İlahi vıjniyə şəxson bo ə həzrəti ə ləğəbonış noə.rəvoyətədə omə ki,bo ə həzrəti çe Xıdovəndi nəzdədə nəv qılə ism heste.Fatmə,Siddiğə,Mıborəkə,Tahirə,Zəkiyyə,Rəziyyə,Mərziyyə,Muhəddəsə iyən Zəhro…

“Fatmə“çe “ Fətmi” rişəku və çe kandə bıə iyən co kardey bıə mənoədəy.Xıdo pəyğombəri(s) azizə kinə bə dınyo omə zəmonədə,Xıdovənd bə qıləy firiştə və mələki əmrış karde ta çe Fatmə nomi bəştə pəyğombəri zıvoni cariko.çən,pəyğombəri(s) bəy Fatmə nomış noe.Fatmə Fatmə nom noey bıə.boçi ki,İlahi irodə bımədə be ki,Əv çe bəd iyən yavə çiyonku bə diyəro bıbu.  

Zəhro çokəti.ruşinəti iyən səfo mənodə və çe Həzrəte Fatmə(s) coqlə məşhurə ləğəbonku qıləyniye.bə Xıdo Rəsuli(s) hamye əsos,Zəhro(s) xılğət çe həzrəte Həxı təbarəkə və təala əzəməti nurikuye.həmonə vohidə nur ki,həzrəte Rəsuli-Əkrəm(s) iyən Əliyyibni Əbi Tolıb(ə) çəyku ofəyə bıən.qıləy nur ki,Xıdo nuri xəzinə daxilədəy.İmom Həsən Əskəriku(ə) dəparsey be:”çıro bo Fatmə(s),Zəhro nom noey bıə?.hamyeşone:çunki,çəy ruxsar iyən çehrə ruji əvvələdə bənə həşiye ki,məşrığiku pemedə və rost beydə.bo Əmirəl-Muminini(ə) dəvəşeydə və ruji nimədə bənə  Ovşımi dətıveydə və Həşi ğurubi zəmonədə bənə astovə ruşin beydə”...

Siddiğə vey rostəvıji mənoədəy və çe Həzrəte Fatməye-Zəhro(s) sədoğət fəğət bə ə həzrəti sıxanon məhdud ni.bəlkəm əmələdə həm ə həzrət Sadığ bıə,həxə sıxanış kardə iyən bəy əməlış kardə və çe həxıku i zərrə həm mınhıərif bıəni.Xıdovəndi tərəfiku bə Fatmə(s) Siddiğə ləğəbi noey,çe Xıdo pəyombəri kinə ismətiku hikoyət kardedə.zira həxı tərəfdor bıey iyən ıştə rəftor,sıxan,əxloğ iyən etığodi həxə royədə nılarze,fəğət bə məsumə şəxson məxsus bıə xısləte.

Xıdovənde-Xalığ Mayidə mıborəkə surə 75-ə şərifə ayədə həzrəte İsa(ə) jıqo təğdım kardedə:”və umməhu Siddiğə”-İsa inə Sıddiğəy”.co tərəfiku pəyğombəre-əkrəmi(s) hamyəşe:”Fatimətu səyyidətu nisaul aləmin minəl əvvəlinə ila axirin.Fatmə çe aləmi sıftəku tosə oxo jenon sərvər iyən barzə qıləyniye”.binobərin qıləy zəmon ki,Kərimə-Ğıron bə həzrəte Məryəmi(ə) ismət iyən siddiğə bıey şoydəti kardedə,Həzrəte Fatməye-Zəhro(s) ki,Siddiğyəe-Kubray və çe həzrəte Məryəmisə(s) barze,qıləy barzə isməti soybe.

Muhəddəsə bə kəsi votey beydə ki,məlayikon deəy sıxanışon votə.Kərimə-Ğıron çandə kərə çe firiştəon de ğeyri-ənbiya və pəyğombəron sıxan kardeyku hikoyətış kardə.həzrəte Məryəmi(ə) bə həzrəte İsa(ə) homiləti cərəyonədə çəy de Xıdo firiştə miyono qıləy votemon bə əməl ome ki,Məryəmi mınorəkə surə 18-21-ə şərifə ayəonədə zikr bıə. hədisonədə həzrəte Fatməku(s) de ın ismi ziyod zikr bıə.bə İmom həzrəte İmom Sadıği(ə) votey əsos.Xıdo oxonə pəyğombəri rehləti bədiqə Həzrəte Fatməye-Zəhro(s) 75 ruj umrış karde və çun bə Xıdo Rəsuli(s) rehləti xoto çe şiddətinə ğəmi dılədə be,Cəbrəyil(ə) çə həzrəti palu omeydəbe və bəy təsəlli doydəbe və çəy pı iyən çə həzrəti barzə məğamuiku və həmçinin pəyğombəri(s) rehləti bədiqə boçəy nəsli bə əməl omə çiyon həxədə xəbə doydəbe və həzrət Əli(ə) həm həm ın xəbon nıvışteydəbe ki,əv həm çe Fatməye-Zəhro(s) Mushəfe.....