Suriyə prezdent bə İslomi İnğilobi Yolə Rəhbər iyən İroni prezdent təsliyətə mesaj vığandeşe
İran Peres: zinə Suriyə prezdent, bə İslomi İnğilobi Yolə Rəhbər iyən İroni prezdent de 2 qılə təsliyətə mesaji vığandey vositə, Kermani terroristiyə hodisə və İroni şahrvandon şəhodəti təsliyət votışe.
Bə İran Peres aqentiyəti raporti əsos, zinə Pencşəmbə Suriyə prezdent Kermanədə terroristiyə hodisədə bə çand qılə İroni şahrvandon şəhodəti xoto, bə İslomi İnğilobi Yolə Rəhbər Həzrəte Ayətullah Xamenei iyən İroni prezdent Seyd İbreym Rəyisi 2 qılə təsliyətə mesajış vığandə.
Bəşar Əsəd ım 2 qılə təsliyətə mesajədə bə İslomi İnğilobi Yolə Rəhbər və İroni millət ıştə səmimanə hamdardi elonış kardə və Xıdoku şəhidonro rəhmət və məğfirət iyən zəxmin bıə kəsonro şəfo tələbış kardə.
Suriyə prezdent təkidış kardə ki jığo terroristiyə həmləon de ım hədəf əncom bıdə ki çəmə milləti ıştə mənafe və prinsiponku bə dast kəşey və ıştən kişvəri kəromət və hakımiyətiku mudafiə kardeyədə bezu bey məcbur bıkon.
Əlməyadin raportış do ki Əsəd bə İroni prezdent, ıştən təsliyətə mesajədə Kermanədə terroristiyə tepımonon məhkumış kardə iyən votışe: ım terroristiyə həmləon ki molki şəxson hədəfış ğəror dodə terroriston və çəvon himoyə kardə kəson bezuəti nışonəy.
Dey manqi 13 minnə rujədə, İslomi İnğilobi Sepah təşkilati Ğuds ğıvvə nakonə komandir Qeneral Ğasım Suleymani şəhodəti 4minnə sorəqardışi mərosimədə və bə İroni cənub, Kermani Qolzare Şuhəda rəsey royədə, ım mərosimi zayiron miyonədə 2 qılə terroristiyə tepımon əncom bıə ki bois bıə 84 nəfər şəhid və 284 nəfər həm zəxmin bıbun.
