Nəhcul-Bəlağə pand iyən hikməton

Nəhcul-Bəlağə pand iyən hikməton

Və ğalə Əli(ə)”bəğiyyətus-səyfi əbğa ədədən və əksəru vələda.şımşi iyən canqiku mandə kəson çəvon dəvom iyən baği mandey vey ziyiod və çəvon fərzəndon veye”.

Nəhcul-Bəlağədə hikmətonku qıləyni həşto çominə hikməte.İmom Əli(ə) bın kəlomədə bə qıləy mırəkkəbə nuktə işorə kardedə və hamyedə:”bəğiyyətus-səyfi()əbğa ədədən və əksəru vələda.şımşi iyən canqiku mandə kəson çəvon dəvom iyən baği mandey vey ziyiod və çəvon fərzəndon veye”.

De bə torıxi qıləy nəzə kardeyədə,millətiku qıləy dastə coqlə qrupi çe miyoniku bardeyro bıə ciddiyə əzmi mışohidə kardedəmon.əvon ki,berəhmonə şikilədə bə iyande həmləşon kardə və nəyinki,merdon,bəlkəm beqınoə hırdənon iyən jenon həm de şımşi bə ğətl rosnəşone ta de ın tərtibi çəvon nəslışon komilə surətədə çe miyoniku bardəşone.çoko ki,muaviyə obn əbi sufyoni zəmon iyən əsrədə çı Əhli-Beyti(ə) duston iyən piyəkəson hevujə formədə ğətli-amışon əncom doe.joqo ki,bə torıxi mənbəon nəğli əsos təğribən sa həzo nəfər deçəy təvəssuti iyən deçəy dasti jiyədə bıə məmuron vositə min cumlə de busr ibn ərtat iyən ziyod ibn əbihi təvəssuti ğətlı-am bin.Səmurət ibn Cundəb qıləy kırtə mıddəti bəpeştə ki, Bəsrə şəhrədə çe ziyod ibn əbihi canişinətiş bə dast qəte,şəş manqi ərzədə həşt həzo nəfərış kışte və ziyod oqardə zəmonədə bəy voteşe:Xıdoku nıtarsiş ki,beqınoə odəmonı kışte?və əy jıqo cəvobış doe: ehyanə çımi dı bərobər həm kıştəmbe,ijən Xıdoku nıətarsim.Əbu Səvvar Ədəvi nomo qıləy şəxs votedə: mıoviyə ikə sıbi zəmonədə çəmə ğovmiku 48 nəfər ki,əvon həmmə hafizi-ğıron bin,kıştışe.

Çımonsə əlovə ziyod ibn əbih çe Əhli-Beytiku(ə)penco həzo xıyzonış çe Kufəku bə İroni şərği dərbədərış karde və çın ğəbiləon əvəzi Şamiku çe uməviyon tərəfdoronış varde və bəvon əyo vırəş doe.mıoviyə zoə yəzid Kərbəloədə berəhmonə ğətli-amisə əlovə Hərrə vağiyədə çe milləti mol,con iyən nomisış boştə sərboz iyən əskəron həlolış zıne.İmom Məhəmməd Bağır(ə) hamyedə:”İmom Həsəni(ə) şəhodəti iyən mıoviyə zəmoni bəpeştə muhimmə bəlo iyən ğətlı-am be.hakəs bəmə ıştə məhəbbəti izhor kardedəbe və nışon doydəbe,əvon bə zindon  şeydəbin,çəvon molon  ğarət kardey iyən çəvon kəon xərob kardey beydəbe iyən ın bəlo və mısibəton dəvomış hestebe tayinki,çe ibn ziyod iyən İmom Huseyni(ə) ğatili zəmon ome rəse”.

Əmmo ımruj ihəzo çandə sa sori bədiqə mışohidə bıə çi,ıme ki,nəyinki,fəğət çe İmom Həsəni(ə) iyən İmom Huseyni(ə) fərzəndon baği mandən,bəlkəm çəvon nəsl anədə ziyod bıə ki,diyəroə vıronədə bıə məmləkətonədə həm çəvonku ziyodə şəxson mevcudin.

Isət çe berəhmonə ğətlı-am iyən baği mandə kəson miyono bıə rabitə barədə Nəhcul-Bəlağə şarif iyən şərhəkəyon kali qıləyniyon bənə Meysəm ibn Əli jıqo hisob kardedə ki,çın dıqlə miyono təbiyi rabitə fəğət İlahi inoyəton iyən Xıdovəndi lutfonin ki,nəslədə bə jıqo məzlumon joqo bərəkət doydə.Joqo ki, ımruj ki,dınyo de ğəsbkorə seonist rejimi təvəssuti məzlumə fələstıni millət bə ğətlı-ami məruz mandedən iyən ıştə kə-bəonku dərbədər beydən,əmmo de Xıdovəndi lutfi iyən de çın mərdumi mislış nıbə mığoviməti çı həzrət Əli(ə) “Əğva ədədən və əksəru vələdən”-i cumlə çəvon barədə bıə nımunəonku bə hisob omeydə.

Hərrə vağiyə çe yəzidi ləşkəri de Mədinə milləti Hicri-ğəməri 63-ə sori bıə ğıyomi hoziyə rəftore.bın vağiyə iyən hodisədə Mədinə millətiku ziyodə şəxson min cumlə çe pəyğombəri(s) səhobəonku 80 nəfər və çe Hafizi-Ğıroniku 700 nəfər bə ğətl rosney bin və çe mərdumi mol iyən nomuson ğarət kardey be.