Nəhcul-Bəlağə pand iyən hikməton

Nəhcul-Bəlağə pand iyən hikməton

Və ğalə Əli(ə)”mən əsləhə ma bəynəhu və bəynəllah...ikəs ki,ıştə deştə Xıdo miyono isloh bıko, Xıdovənd çəy de mərdumi miyono isloh bəkarde və ikəs ki,ıştə axırəti koy islohko,Xıdovənd həm çəy dınyo koon isloh bəkarde və ikəs ki,ıştə vucudi dılədə qıləy vayizış bıbu,Xıdovənd boəy qıləy hafiz iiyən hıvoskə ğərol bədoe”.

Əmirəl-Muminin Həzrət Əli(ə) Nəhcul-Bəlağə həşto nəvminə nuroniyə hikmətədə bə seqlə muhimmə ko işorə kardedə və hamyedə:” mən əsləhə ma bəynəhu və bəynəllah...ikəs ki,ıştə deştə Xıdo miyono isloh bıko, Xıdovənd çəy de mərdumi miyono isloh bəkarde və ikəs ki,ıştə axırəti koy islohko,Xıdovənd həm çəy dınyo koon isloh bəkarde və ikəs ki,ıştə vucudi dılədə qıləy vayizış bıbu,Xıdovənd boəy qıləy hafiz iiyən hıvoskə ğərol bədoe”.

Bın hikmətədə İmom Əli(ə) çe insoni de Xıdo rabitəku,çe insoni de milləti miyono rabitə və həmçinin çe dınyo de axırəti miyono rabitəku sıxan votedə.

Çın hikməti sıftədə İmom Əli(ə) bə qıləy muhimmə nuktə işorə kardedə ki,əv çe insoni de Xıdovəndi bıə rabitəy.yəni ha r qıləy ləzə iyən qıləy zəmon ki,inson de qıləy məsələ dimbədim omeydə,ıştə qırd səyon iyən ciddiyəton bın koyədə noydə ki,həmməysə vey çokə əksul-əməl iyən reaksiyə nışon doydə ta bə Xıdovəndi roziyəti səbəb bıbu.çımisə əlovə deştə Xıdo rabitə isloh kardey şərt sodiğəti,əmonət iyən rostəvıjətiye.təbiiye ki,iqlə şəxs ki,sodiğəti,əmonət iyən rostəvıjəti boştə jimoni sərlohvə ğərol bıdo,mərdum iyən millət həm bəy etımod bəkarde və ın etımod ıştə dumo qıləy umumi rəğbət və hurmət vardedə.həmçinin ikəs ki,deştə axırəti koy isloh kardey məşğul bıbu yəni bə İlahi əmron itoətko və munkərat və nəhy bıə çiyon tərk bıko,bə Xıdovəndi lutfi şomil bəbe və Xıdovənd çəy dınyo koon isloh bəkarde və səro-səhmon dəbənoe.

Çoko ki,şımə zıneydon çəmə dılon de maddi dınyo jimoni uns qətey iyən bə hənışinəti xoto,pas qəteydə və siyo beydə.liza çəy bə sofəti iyən şıştemoni qıləy niyoz və ehtiyociş heste.bo sof iyən təmiz kardero həmməysə vey çokə vəsiləonku qıləyni daxiliyə vayiz iyən moyizəkəy.çəmə dılədə qıləy vayiz heste ki,ehyanə bəçəy təzəkkur iyən pandon quş bıdəmon və dığğətkəmon, beşək çəyku qıləy bəhrə bəbardemon.çın vayizonku qıləyni Xıdo doə fitri vijdone ki,çe har qıləy insoni dılədə və daxilədə mevcude.harçənd qahi zəmon bə xarici amilon iyən bə şəytoniyə vəsvəson xoto bəçəy dimi piyo qıləy maneyə iyən pardə kəşey beydə,əmmo xoşbaxtonə de qıləy kamə dığğəti iyən pasi təmiz kardey,həmonə paardə bə kəno şeydə.imon çe daxili vayizonku coqləyniye ki,bə fərdi rufi ruşinəti boyis beydə və zıvon iyən çe bədəni coqlə uzvon çe imoni nuri təsiri jiyədə ğərol doydə.şəxs bın holədə qıləy çi votedəni iyən har qıləy ko əncom doydəni. çıro ki,imon çı insoni vucudədə qıləy Xıdoku tarsi holəti icod bəkarde.joqo ki,ehyanə həm insoniku qıləy qıno bə əməl booy,bilofosilə peşmon bəbe və tobə bəkarde.iyoe ki,Xıdovənde-Mutəol bə jıqo qıləy fərdi koməq bome və bəy koməq bəkarde iyən əy hifz bəkarde.liza İmom Əli(ə) çın boho ğeymətinə hikməti oxonə baxşədə hamyedə:”və ikəs ki,ıştə daxilədə qıləy vayizış bıbu,Xıdovənd boəy qıləy hafiz iyən nığo doə kəs ğərol bədoe”.

İmom Məhəmməd Bağıriku(ə) omə rəsə qıləy hədisədə jıqo hamyedə:”mən ləm....ikəs ki, Xıdovənd boəy qıləy daxiliyə vayiz ğərol nıdo,çe mərdumi moyizəon hiçvaxti boəy qıləy foydəş nibəbe”.bə İmom Bağıri(ə) hədisi əsos,əgər insoni qıləy daxiliyə vayizış nıbu,həni coqlə vayizon boəy hiç qıləy foydəş nibəbe.çın sıxani barizə nımunə Kərbəlo səhroədə bə əməl omə vağiyə be.joqo ki,çanədə əba Əbdullah İmom Huseyni(ə) bo dışmeni ləşkəri moyizəş karde,əmmo çımi boəvon hiç qıləy foydəş nıbe.