İrəvon iyən Moskvə lideron dido

İrəvon iyən Moskvə lideron dido

Xosə həmzıbvonon! İrəvon iyən Moskvə lideron dido nəticədə çı Rusiyə prezdent Vladimir Putini de çın kişfəri ləşkəri i hissə ermənıstoni kali noxtəonku xaric kardey ko rozi bıə.Kremli sıxanəvot Dmitri Peskov pencşambə ruji (9 may)bə İnter Faks xəbə aqentəti elonış kardə ki,Moskvədə çe Putin iyən ermənıstoni sərvəzir Nikol Paşinyani miyono bıə vindemonədə dıqlə tərəf  Cənubi Ğafğazədə çın kişfəri bəzi məntəğonku çe Rusiyə hərbi ğıvvon  iyən marzi qvardiyə bekardey həxədə bə roziyəti oməyn.əmmo çı ermənıstoni sərvəzir fe`li iyən ısətnə şərayitədə votedə ki,bə şərayiti əvəz bey dəlili xoto,ermənıstoni kali noxtəonədə həni bə urusə sulhmərominə ğıvvon huzur iyən iştiroki qıləy niyoz mandəni.bəhisob Putin de Rusiyə hərbi ğıvvon  iyən marzi qvardiyə çe ermənıstoni kali noxtəonku xaric kardey ko rozi bıə.

Jıqo bə nəzə rəseydə ki,Tırkiyə iyən Oz. Respublikə rəhbəron de ermənıstoni “Siyunik” əyoləti ilhoğ kardeyədə bıə isror,min cumlə çe Nikol Paşinyani de urusə sulhmərominə ğıvvon çe ermənıstoni cənubədə iştiroki dəvomi məğsədi bıə roziyəti bıbu.bın zəminədə iqlə muhim iyən əhəmiyyət kəsb kardə nuktə ıme ki,çı Rusiyə prezdent Vladimir Putini bə Nikol Paşinyani devləti 2018-ə soriku bıə anti-urusə siyosəti məxsusən oxonə i sori dırozi lağeyd mandey iyən bedığğətətiye.jıqo bə nəzə rəseydə ki, ilham əliyevi devlət ki,çe reqiyoni xariciku bıə çandə qılə xarici kişfəron himoyə jiyədə ğərolış qətə,de ermənıstoni əraziyon işğal kardey məğsədi,çı beynəlxalğə sehyonizmi təhlukəninə pantırkistəti cərəyoni təbliğoti siysoətış vıjniyə.məsələn de ın ko əloğədor bə Boku hukuməti nez bıə mediya təbliğoton işorə kardey bəbe.

Əzizə əməson.həyğətədə ilham əliyevi devləti rəsmiyon jıqo təsəvvır kardedən ki,sosyal şəbəkəonədə de ın aqressivə təbliğoti şivə ermənıstoni çəy ıştən vırədə nıştovney bəzıneyn,əve bə ın xətərnok iyən təhlukəninə hərəkəton dast ğandedən.ım qıləy holədəy ki,ilham əliyevi devlət de İroni sazışi bədiqə,bın dəvardə sori çandə kərə elonış kardəbe ki,həni bə ermənıstoniku ərazi sey qıləy niyoz iyən ehtiyociş ni. ilham əliyevi devləti rəsmiyon çın həyğətonku xəbədon ki,tırkiyə bə ozorboyconi respublikə daxili idorəon,bəçəvon devləti siyosi,hərbi iyən devlətə onemonon ziyodə nufuzışon heste.bə ilham əliyevi devləti nez bıə syosi eksperton veyni,ğərb təmayulinə fəolə partiyəon lideron,bə Boku hukuməti nez bıə mediyəon dıjdə baxş və hətto Ərəsi ru şimolədə bıə mısılmonə millət həm,çe pantırkıston iyən beynəlxalğə sehyonizmi dayimiyə təbliğoton təsiri jiyədə ğərolışon qətə və tırkiyə devləti bəsə çe ilham əliyevi devlətisə bəpe qəteydən və təğdım kardedən.məlume ki,ın zəyifə noxtəon çe ilham əliyev iyən çəy ətrofi şəxsi zəyifətiku nəşətış sıə ki,ozorboyconi respublikədə ziyodə həddədə bo tırkiyəro bə dast dənoə təbliğotonış tədaruk vində.ha holədə şək ni ki,çın prosesi dəvom pəydo kardey çe Boku hukuməti məxsusən ilham əliyevi ıştəni de şiddəti təhdid kardedə.

Əzizə əməson.harçənd ozorboyconi respublikə de ermənıstoni miyono de avropə ittifoğ iyən rusiyə vositə co-co mızokirəon bə əməl omə,əmmo ijən həm bın çərçivədə çın dıqlə kişfəri miyono qıləy sulhi saziş imzo kardey bıəni.çe boku iyən irəvoni rəsmiyon miyono bıə dıtərəfinə iclosonədə dığğət kardənin iyən muhimmə nuktə ıme ki,vədə bıə dı tərəfi miyono sazışi sulhi mızokirəon,bə milodi 1992-ə sori Alma-Atə iclosədə Cənubi Ğafğazi kişfəron təəhhudon iyən sazişon əsose.ermənıstoni devləti elonış kardə ki, bəvədə hozzı bəbe ki,de azəri tərəfi bo sulhi mızokirəon imzo kardero mizi kəno bənışte ki,çe dıqlə tərəfi miyono Alma-Atə iclosi təəhhudon meyor bıbu.

Ozorboyconi Respublikə siyosi ekspert iyən Atləs təhğiğot mərkəzi rəyis elxan şahinoğlu həm votedə: holı-hozıyədə ozorboyconi respublikə de ermənıstoni miyono dıqlə proses mevcude.iminə proses çe dıqlə kişfəri delimitasiyə iyən demarkasiya yəni marzon və həddon təyin kardey məsələy.dıminə proses həm çe xarici koon vəziron nəzorəti jiyədəy və bə sulhi sazışi oxonə mətni ayide.harçənd iyo hiç qıləy oşkoə inkişof mevcud ni.əmmo sərostə formədə bıə mızokirəon əncom doə bıə holədəy.

Bə ilham əliyevi devləti nez bıə ın koşınos eyni holədə elonış kardə:Rusiyə de oşkoə formə bə ozorboyconi respublikə de ermənıstoni miyono bıə sərostə formədə bıə mızokirəon qıləy rəğbətış ni.zira ıştə təsiri çı dasto bədoe.qıləy zəmon ki,Rusiyə bənə qıləy vositəçi unvoni əməl kardedə,bə har dıqlə tərəfi nufuz kardey fırsəti bə dast vardedə.

Məlume ki,çe Ğərəboği mınoğişə dıqlə tərəfi bə Rusiyə bıə mənfiyə nəzə fik-fam kardənine iyən nışon doydə ki,har dıqlə kişfər bə xariciyonku bə şıkrə bıə cərəyonon tori eqıniyən və çəvon əsliyə hədəf həm Rusiyə çe Ğərəboği sulhi mızokirə prosesonku xaric kardeye.