Mığoviməti Cəbhə səbarzəti
Mığoviməti Cəbhə səbarzəti
Mığoviməti qrupon çoko ki,de iyande bıvə iyən mıttəfiğin,çe canqtələbə dışmenon mığobilədə sabitğədəm iyən sazış ğəbul kardedənin.bənə amerkə devləti iyən sehyonsit rejimi bıə dışmenon və çəvon dasti jiyədə bıə dastəon ki,de canq iyən ğətlı-ami təvəssıti ıştə sultə jiyədə oqətey,əvoni ğarət kardey iyən əvoni dərbədər kardey dumon.Mığoviməti Cəbhə həm ki,mərdumi difo iyən mıdofiyə kardey qıləy İslomi iyən insoni vəzifə zıneydən,bo çın cinoyətkorə dışmenon şərri dəf və bərtərəf kardero iyən bo jenon və hırdənon əmniyyət iyən oroməti təmin kardero,deəvon cihod iyn canq kardedən.ım canq bə Xıdovəndi bəştə pəyğombəri(s) doə ğətiyyətinə fərmoni əməl kardeye ki,hamyedə:”Ha pəyğombər ha! de kofiron iyən mınofiğon cihodkə iyən bəçəvon ələyh ciddi(saxtqir)bıbi.çəvon vırə cəhəndıme və çe yavə qıləy sərnıvıştışon heste”…
Harçand amerkə devləti iyən sehyonsit rejimi canqtələbəti iyən dışmenəti bın dəvardə da soron dırozi dəvomış bıə və ımruj bəm de uryon iyən hoziyə formə ziyod bıə holədəy.əmmo məələsəf çe İslomi kişfəron yolonku kali qıləyniyon de əvon sazış kardey dumon.ın dışmenon çandə kərə nışonışon doə ki,fəğət bə zəmon bo mızokirə kardey iyən sulh bərpo kardero hozzı bəbeyn ki, bəvon veyə imtiyoz doey bıbu və oxoyədə həm bə həmonə mığovilə maddə və bəndon rioyət həm kardedənin….
Əmmo Xıdovənd Ğıronədə de ruşinə formə çe mısılmınon de inodkoə dışmenon bıə sulh və sazışi rədd kardedə iyən çe Mumtəhinə mıborəkə surə iminə şərifə ayədə jıqo hamyedə:”Ha imon vardə kəson ha! çımı iyən ıştə dışmeni dust məqətənən.şımə bəvon nisbətədə məhəbbət izhor kardedon,qıləy holədə ki,əvon bə həxədə boşmə omə çiyon kofir bıən…”.de ın tərtibi de bənə amerkə iyən israyili bıə dışmenon nəyinki,bə Fələstınıjon muşkilon iyən işkilon həlli koy koməq kardedənin,bəlkəm sehyoniston bə Fələstınıjon ələyh zılm iyən cinoyəton dəvomədə əvon həni həm behəyo beydən.binobərin,çoko ki,İslomi İnğılobi Yolə Rəhbər Həzrət Ayətullah Xameneyi oşko elonışon kardə:(dışmeni mığobilədə)Mığovimət nışon doey mumkine qıləy xarconış bıbu,əmmo ziyodə noiliyyətonış həm heste….əmmo çe inodko və xəbisə dışmeni mığobilədə təslim bey,ğərəz lınqo-po jiyədə mnndey,sıvoy zəlil bey və ğərəz be hoviyyət bey co hiç qıləy təsirış ni….
İslomi Mığoviməti Mıcohidon çe hiyləqərə dışmeni həmməysə muhimmə ulqu çe Xıdo Rəsuli(s) əziz-qramiyə nəvə Həzrət İmom Huseyni(ə) çe mıstəbid iyən fosidə bəni uməyyə bənə yəzidi bıə hukuməti mığobilədə mande.ə həzrət bayinki,kardey əzıni bə yəzidi sıtəmkor iyən anti-islomə hərəkəton dığğət nıkardo və deəy sazış iyən beyət kardey əzıni,əmmo bə Xıdovəndi fərmoni iyən bəştə buzurquvarə cəddi sınnəti əsos,çəy vədə mande iyən mığovimətış nıson doe.harçand çı Həzrət İmom Huseyni(ə) ın izzətmandə hərəkət de ə həzrət iyən deçəy duston şəhodəti və deçəy xıyzoni əsirəti bə oxo rəse,əmmo çə həzrəti sazış ğəbul nıkardey iyən bə zılmi zidd ruhiyyə,torıxi dırozi bo de sultətələb iyən canqtələbə dışmenon mıborizə bardero bo qırd dınyo ozodi piyəkəson qıləy çokə ulqu və nımunəy.çı Həzrət İmom Huseyni(ə) Kərbəloədə bıə ğıyomi nufuz iyən təsir çe Mığoviməti Cəbhə rəhbəron sıxanon iyən əməlonədə çok-çoki buruzış pəydo kardə. joqo ki,çe Livani Hizbullah mərhumə sər katib Şəhid Seyd Həsən Nəsrullah votedəbe:”çəmə har ruj Aşurə iyən çəmə har qıləy məkon Kərbəloye.və ha Huseyn ha!əmə ın cihodi meydoni hiç vaxti tərk nibəkardemon”.və çı Həmasi mərhumə rəyis şəhid Yəhya Sinvar həm de bə sehyonist rejimi mıborizə bardey təkid kardə holədə votedəbe:”əmə bəpe bəştə bino kardə məsir iyən roy dəvom bıdəmon.bıdə qıləy nuyə Kərbəlo bə əməl boy”….
