İroni məzlumiku himoyə

İroni məzlumiku himoyə

İronədə məzlumon mıdofiyə iyən de sultə tələbon mıborizə fəğət çe məsul şəxson vəzifə ni,bəlkəm İroni millət həm hejo bənə sıtəmi jiyədə bıə iyən renc vində kəson mıdofiyə unvoni zıney beydə.ın xıslət çəvon İnsoni hisson iyən İslomi bovəonku nəşət seyəşe və bə həmonə coğrafi,irği iyən əğedəvi marzon dəlili xoto zıneydənin.bə hisob Ələğsa tufoni əməliyyoti bədiqə qıləy zəmon ki,sehyonist rejimi cinoyətkorə ləşkər çe Ğəzzə tanqə sakinon ğətlı-ami koş bino karde,İroni mərdum həm boəvon koməq cəm kardey koş bino karde.əmmo məələsəf de sehyonist rejimi cinoyətkorə ləşkəri təvəssıti mənzilon,noxəşxonəon iyən umumi məkonon vəhşiyonə formədə bombardımon kardey iyən marzon bastey,çe xorəki maddəon iyən dəvo-dəmoni bə Ğəzzə tanqə mərdumi dasti rəsey royış təmomən məhdudış karde.sehyonist rejimi irğçiyə səyvonon çın cinoyətkorə strateqiyəku bə Livani milləti ələyh həm okoşon doe iyən de amerkə istejsol kardə bombəon bəçəvon şəhodət iyən hevujə surətədə ıştə kə-bəonku avarəti səbəb be.Livanədə çın insoni iyən humanitarə fociyə bədiqə ironıjon ijən həm bəştə dini iyən insoni məsuliyyəton xoto bəçəvon koməqi səmt hərəkətışon karde.

Məxsusən ki,çın həmlə bənav İslomi İnğılobi Yolə Rəhbər Həzrət Ayətullah Xameneyi de qıləy fətvo jıqoşon bəyon karde:bə həmmə mısılmınon fərz iyən vocibe ki, çe Livani mərdum iyən səbarzə Hizbullah kəno bımandon və de ğəsbkor,zolımkor iyən xəbisə rejimi mıborizədə bəvon koməq bıkon.ısət İroni mərdum bo bə Livani milləti iyən mığoviməti cəbhə koməq kardero qıləy həmdıləti iyən həmrayəti fəzoədə vey barzə səviyyədə iyən de qıləy həyəconi ıştə dasto omə kooon əncom doydən.İroni millət deştə dıli xoşi,kollektivə surətədə iyən mislış nıbə formədə bə Livani mısılmonə milləti iyən mığoviməti cəbhə koməq rosnero de ”həmdılə İroni”nomi qıləy kampaniyəş bə ro dəğandə və bərpoş kardə ta bə qiromiyə pəyğombəri(s) nido qıləy cəvob bıdon ki,ə həzrəti jıqoş hamyə:”Hakəs çe qıləy məzlumi sədo bıməso ki,çe mısılmınonku koməq tələb kardedə iyən bəçəy koməqi səmt hərəkət nıko,əv mısılmon ni”.

Harçənd İroni millət ıştə zu vışkiye mığdorədə bəştə Livanıjə bıvon iyən hovon koməq kardedən,əmmo çəvon vığandə kali hədiyyəon vey səxovətmandə formədə iyən odəmi dığğəti cəb kardedə.məsələn, İronıjə banunon və xanımon bo bə Livani niyozmand iyən sərqərdonə milləti koməq rosnero ıştə ziynət əşyoon və telıon hədiyyə kardey məğsədi qıləy kampaniyəşon bə ro dəğandə və bərpoşon kardə ki.çəvon koməq rosney mığdor və mizon odəmi bə heyrət vardedə.