Pezeşkiyan:De Ğətəri munasibəton nığıl kardero ğəroron ğəbul kardemone

Feb 21, 2025 05:18 Asia/Tehran

İron İslom Respublikə prezdenti votəşe:De Ğətər əmiri ıştə məsləhətonədə əmə,bo munasibəton nığıl kardey və nuyə həmkoməti roon ojbeyro çokə ğəroron ğəbul kardemone. “Pars Today” bə Tele-Rədyo xəbə aqentəti istinodən doə məlumoti əsos,İron İslom Respublikə prezdent Məsud Pezeşkiyan pəynə pencşambə ruji de Ğətəri əmiri Şeyx Təmim bin Həməd bin Xəlifə Al Sani mıştərəkə didoədə votəşe ki,İron iyən Ğətəri rəsmiyon dəvominə vindemonon,çe İron iyən Ğətəri miyono ixtisodi və reqiyonal məsələonədə mehkəmə torıxi və mədəni əloğəon nışon doydə ki,çəmə nezə nəzəon bə dıqlə kişfəri miyono bıə reqiyonal iyən beynəlxalğə məsələon əsose.

Bın didoədə Pezeşkiyan çe İron İslom Respublikə hukuməti əsosə siyosətonku qıləyni de hamsuyə kişfəron və de reqiyoni siyosi,ixtisodi,mədəni,hərbi və əmniyyəti bıə sahəonədə rabitəon zumand kardey və inkişof kardeyışon ğeyd kardə.

İron İslom Respublikə prezdent çe Ğətəri devləti bə xususi mevğey malik beyış bəyon karde və əlovəşon karde:Əmə de dıtərəfinə məsələon anqıl və de dıqlə kişfəri mənafe təmin kardey məğsədi əloğəon inkişof kardero və nığıl kardey və nuyə həmkoməti roon ojbeyro çokə ğəroron ğəbul kardemone.

Məntəğə kişfəron reqiyonədə sabitəti və əmniyyəti muhafizəro bə mehribon hamsuyəti,dı tərəfinə hurmət və konstruktivə həmkoəti fəoliyyəti əsos qəmon peqətey bəzıne və bo mıştərəkə həmkoəti kompleksi icod kardero roon oj kardey bəzıne.

İron İslom Respublikə prezdenti bə Suriyə ərazi dırıstəti və suverenəti muhafizə və bə qırd Suriya xalği ıştə mığəddəroti təyin kardeyədə iştiroki təkidış kardə.Əv,həmçinin bo Ğəzzə mərdumi dard iyən iztirobon kam kardey və çe seonist rejimi bə Fələstini milləti ələyh cinoyəton oqətey və bo cinoyətkoron əməlon təğib kardero bə İslomi kişfəronku vey ciddiyə tədbiron və tənzim kardeyədə imzo ğandey təkid kardəşe və əlovəş kardə:Əmə bovə kardedəmon ki,reqiyoni və dınyo həmmə hukuməton və xalğon,bə İlahi və bəşəri erjon əsos, bo Fələstıni milləti xususən həm Ğəzzədə bıə mərdumi mıdofiyəro ıştə qırd səyonku oko bıdon ta çəvon ıştə torıxi sərzəminədə qıləy əmnə jimonışon bıbu.