İslom dınyo i bemon yolə ğudrəton boctələbion vədə mandeyro yeqanə roy

İroni Yolə Rəhbər islom dınyo har rujnə ziyod bıə izzət ijən yolə ğudrəton zu tətbiğ kardey və boctələbion vədə mandey yeqanə roy çı islomi umməti bəsirət iyən vəhdəti jintonədə zınəş be.

İroni Yolə Rəhbər ımruj fıtırə idi nımoji bəpeşt de rəsmi şəxson, islomi kişvəron səfiron və umum milləti vindemonədə bə İroni bə həmməy islomi dıvləton səmti bıvəti dasti dıroz kardey təkid kardışone iyən votışe: Fələstin iyən Livanədə bıə sionist rejimi və çəyku himoyə kardə kəson stajış nıbıə cinoyəton vədə mandey təsirinə roy islomi dıvləton miyono həmzıvoni iyən həmdılətiye.

İmom Xamenei həminə vindemonədə və İroni millət iyən islomi kişvəron  Fıtırə idi təbrik votey, ın İdi çı islom dınyo bə yandey rabitə doey iyən islom umməti və çəy qiromi Rəsuli har rujnə ziyod bıə izzəti boyis zınəş be və əlovəş karde: bə ın izzəti çimisə əlovə beyro islomi umməti i bemon, cəhd iyən bəsirəti əlovə kardeye.

Ə Həzrət bə dınyoədə bıə yande bə peşt ıyən surətinə hodisəon işorəşon karde və votışone: həminə surətinə hodisəon islomi dıvləton bəpe de surəti iyən diğğət ıştə vırə təyin və çəvon barədə fik iyən planışon bıbu.

İslomi İnğilobi Yolə Rəhbər çı mısılmonə xalği ziyodə cəmiyəti, təəbyi sərvət iyən dıyo vey muhimmə cuğrafiyoədə vırə kardey çı İslom dınyo muhimmə fırsətonku bə hisobış varde və hamiyəşe: həminə fırsəton və həssosə xosyətonku istifodə kardey çı İslom dınyo vəhdət və i bemone ki həlbətə çəy məno dıvləton de həmmə siyosi məromon i bey məno ni bəlkəm ıme ki bəpe mıştərəkə mənafe zıney iyən ıştə mənafe eloniku bəpeşt harcurnə dave və ixtilofonku bə kəno əloğəon tərif və tərtib bıbu.

Həzrət Ayətullah Xamenei islom dınyo bənə qıləy ailə bə hisobış varde ki islomi dıvləton bəpe bə çəy əsos fik iyən əməl bıkon, ə Həzrət əlovəş karde: əmə ıştəni de islomi kişvəron bənə bıvə, qıləy kollektiv əsosi cəhbədə zınıydə.

İmom Xamenei islomi kişvəron miyonjo həmkoəti iyən həmfikion çı təcavuzkor və sitəməkə ğudrəton zu tətbiğ karde, boctələbi iyən təcavuzi mane bə hisobış varde və əlovəşon karde: de təəsufi ımruj zəifə dıvləton iyən millətonku boctələbibənə istikbori kişvəron daimi koy əvəz bıə ki çəvon muğabilədə əmə islomi kişvəron bəpe islom dınyo həxiku mudafiyə kəmon iyən bə Amerkə iyən ğeyri Amerkə harcurnə boctələbion icozə mədəmon.

Ə Həzrət bə sionist və çəyku himoyə kardə kəson cinoyəton xoto Fələstin iyən Livani bənə zəxminə milləton zınəş be iyən həminə rencon vədə İslom dınyo muğaviməti lozim bey işorəş karde və votışe: de İslomi dıvləton həmzıvoni iyən həmdıləti co kəson həm mığət bəben  və əmə umudəvumon ki islomi kişvəron rəsmi şəxson kardey bıznon dıştə irodə və ənqizə iyən hərəkəti İslomi həğiği umməti təşkil bıdən.

In vindemoni əvvələdə İroni prezident İzzət, səbarzəti, vəhdət, qızəşt, bıvəti iyən bə məzlumon komək kardey mısılmononro Mubarək rəməzonə mamqi vey muhimmə təlimonku zınəş be və bə islomi kişvəron səfiron xətob votışe: islom dınyo ımrujnə koy ıme ki de ixtilafon bə kəno noey sionist rejim və islom dini dışmonon vədə i bebəmon.

Məsud Pezeşkiyan təkidış karde: İron islom respublika ıştə dustiyəti dasti bə həmmə islomi kişvəron tərəf dıroz kardə.