Əli Laricani:Livani mərdumi bə AİŞ-on ğəyyuməti ehtiyociş ni

İroni Ali Milli Əmniyyət Şura katib Əli Laricani votəşe ki,Livani milləti bə AİŞ-on ğəyyuməti niyozış ni

İron İslom Respublika Ali Milli Əmniyyət Şura katib Əli Laricani bəyonış kardə ki,çəmə piyə çi ıme ki,reqiyoni hukuməton mıstəğil və zumand bıbon və votəşe:Imruj reqiyoni məmləkəton bə seonist rejimi fitnəon ələyh qeşə həmkoəti kardey zəruriye.

Pars Tudey bə İRNA istinodən doə məlumoti əsos,İron İslom Respublika Ali Milli Əmniyyət Şura katib Əli Laricani şambə ruji bə Livani kardə səfə zəmonədə bə jurnaliston votəşe:Livan çəmə dustə kişfəre və bə ın səbəbi xoto əmə de ın kişfəri mıxtəlifə sahəonədə məsləhəton kardedəmon.

Laricani əlovəş kardə:Livan hırd həm bıbu,bə seonist rejim ələyh qıləy zumandə kişfər bə hisob omeydə və ım,çəy cıvonə nəslədə bə meydon beşə zumandə irodəku bə əməl omeydə.İron İslom Respublika Ali Milli Əmniyyət Şura katibi təkidış kardə:Livani millət mudrikin və bə qıləy vəli iyən ğəyyumi niyzoış ni.ın usul fəğət Livanədə ne,co vıronədə həm məğbul ni.

Əli Laricani həmçinin de seonist rejimi bə İroni zidd mumkinə hucumi əloğədor sıvoli cəvobədə votəşe:İron İslom Respublika bo qırd şərayiton hozzıye.Əmmo israyilıjon anədə beməxəti kardey fik kardedənim,əqər əvon ımi bıkon,bəvon ğoymə cəvob bədomon.