Qrossi:Əmə de İroni hartərəfinə əloğədə beyımon piyedə
Beynəlxalğə Atom Enerji Aqentəti(BAEA) sər direktor seşambə şəvi zəmonədə votəşe ki,de İron İslom Respublikə sənibəton tammə formədə əloğədə beyımon piyedə.
Qrossi bə İroni de İMT nuvə nəzorəti orqani dəvom kardə həmkoəti işorə nıkardə holədə votəşe:"Əmə İslomi Respublikə tam iyən komilə formədə əloğədə beyımon piyedə ta çəy nuvə obyekton və sayton nəzorəti fəoliyyəton bərpo kardey bızınəmon".
BAEA sər direktori Maniladə bıə nıtğ,cımə şəvi BAEA İdorə Heyəti tərəfiku de Avropa Troyka və Amerkə təşəbbısi ğəbul kardə bıə ğətnomə bədiqə bəhs kardey be.Ğətnomədə çı AİŞ-on dəvardə tovostonədə bə İroni dincə nuvə obyekton təcavuzkorə hucumi hiç qıləy istinod nıkardey çe İroniku qəncin kardə bıə urani ehtiyoton və bombardman kardə bıə nuvə obyekton vəzyəti barədə bə aqentəti "təxir nıkardə holədə" məlumot doey tələb kardey bıə.
İroni xarici koon vəzir Seyd Əbbos Ərağçi həm çın hodisə bədiqə çe Ğahirə Sazişi ləğv kardeyış bəyon kardə;ın saziş çe mufəttişon de bə İroni nuvə obyekton daxil bey əloğədor ımsor sentyabri 9-ədə de Aqentəti imzo kardey bıəbe.
