İroni nati bə Rusiyə sadir kardero imzo bıə mığovilə.

Sənkt Peterburqədə bıə iğtisodiyə beynəl xalğiyə iclosi kənoədə İroni nati har ruj 100 həzo barel bə Rusiyə sadir karde mığovilə imzo bıə.

Çımiku bə nav çı İroni nat vəzir Bijən Namdar Zənqənə elanış kardə bıə ki bə qıləy təvafuği əsos İron har ruj 100 həzo barel nat bə Rusiyə bedoy ta Rusiyə həm bə təğin bıə məğsədon əsos əvoni sadir və eksport bıkə.

Bə Tele-Rədio raporti əsos ım iclosi kənoədə və bo İronədə nat və ğaz sənayeədə sərmoyə noero çı Rusiyə Lok Oil nomo bıə şerkət həm de İroni Nat Milliyə kompaniya qıləy həmkari sənədi imzoş kardə.

Rusiyə iğtisod yolə beynəl xalğiyə 3 rujiyə iclos de muxtəlifə kişvəron və beynəl xalğiyə rəsmi şəxsiyətonku nımoyəndəon iştirok karde 2 ruj çımiku bə nav Sənkt Peterburqədə bino bıə.

İroniku çı İroni nat vəzarətxonə beynəl xalğ və ticarət muavin de İroni rabitə və texnoloqiya vəzir bə i co həminə iclosədə iştirokışone.

Im iclosi dəvoniyəku qıləy hədəfon bo dınyo muxtəlifə muhimmə iğtisodi mıvzoon ğəraron mıəyyən karde ijən həmkarion inkişof doe ğeyd bıə.