Dıminə Ğərəboği Canqi Loyihə Məğsədon və Nəticəon-1

Dıminə Ğərəboği Canqi Loyihə Məğsədon və Nəticəon-1

Xosə Tolışon səlom, şımə cımə ruj bə xəyr bıbu, əzizon ımruj qıləy məxsusə bərnomə bino bəkamon ki Ğərəboği 2 minnə canqi plani nəticə iyən hədəfon iyən ım canqiku Azərbaycan Respublika, Tırkiyə, sionist rejim iyən Rusiyə hədəfon barədəy ki çand qılə bərnomə ğolibədə bə şımə xıdmət təğdim bəbe. Dəvət kardəm dəmə bə ico bımandən.

Əzizə əməson, jəqo ki zıneydəmon, Ğərəboği bıhron, vey kanə no-oromətioninku qələynie ki Səvet hukuməti sərzəminonku baği mandə. Ğərəboğ məntəğə ki Səğirə Ğəfğaz iyən Ərəs və Kura ruon sərzəminon kəno miyono ğəror qətəşe, təğribən 4400 kilometr hevujəti şe. Im məntəğə, İroni torixiyə coqrafiya baxşonku qıləyni bə hisob omeydə. Çəy mərkəz Stepanakrete ki Azərion çəy nomi Xankəndi zıneydən. Im torixiyə sərzəminədə, Əramənə cəmiyət, Azərion cəmiyətiku veye. Miladi 1988 minnə sori, Feveralə manqədə, Ğərəboği iminnə canq bino be iyən Miladi 1994 minnə sori Martədə de otəşbasti təvafuğnomə vositə bə oxo rəsə. Ğərəboği iminnə canqədə, əlovə bə bandiyə Ğərəboğ, çəy ətrofədə bıə 7 baxş bıə həm, Erməniston iyən Ğərəboği Separatçion vositə, işğal bıə.

Ğərəboği iminnə canq, Cənubi Ğəfğazədə təğribən 30 sor, "nə canq və nə sulhi vəziyəti " hakimış kardə. əmmo Miladi 2020 minnə sori Pozə fəslədə, de Tırkiyə iyən sionist rejimi mıştərkiə plani, Ğərəboği daveon ijən bino bıə. iyən 44 ruj dəvomış be. Nəhayətədə 2 tərəfi miyonədə, de Rusiyə visodətçiyəti, atəşbasti təvafuğ imzo be.

Ğərəboği canqədə, Azərbaycan Respublika, xususi hədəfon dumoədə be, ım kişvəri oşko iyən əsliyə hədəf, ıştə dastiku doə, sərzəminon ijən bə dast varde be.

 Əmmo Azərbaycan Respublika rəsmi şəxson hərəkəton iyən sıxənon nışo doydə ki əvon ım canqi ğolibədə, co qılə plan, niyyəton iyən məxfiyə hədəfon dumoədə bin. Jəqo ki vote bıdə, çı Azərbaycan Respublika oşko iyən iminnə hədəf, ıştə həmmə sərzəminon bə dast varde be.

Jəqo ki votımone, Ğərəboği iminnə canqi mıddətədə, Azərbaycan Respublika sərzəminon de Erməni iyən bandiyə Ğərəboği hərbion vositə, işğol be və  Ğərəboği 2 minnə canqədə, Azərbaycan Respublika səyo cəhdış kardə ki ım məsələ kontrol ko.

əlovə bə ım sərzəminon, bandiyə Ğərəboği baxşonku qıləyni, xususi şuşa streratejikə şəhr, de Boku vositə kontrol bıə. Həlbətə Ğərəboği Ermənion, bandiyə Ğərəboği məntəğə co baxşon əcumlə Stepanakret ya Xan kəndi şəhri ıştə kontrol oqətəşone.

Azərbaycan Respublika əlovə bə Ğərəboği kontrol kardey hədəf, co qılə məxfiyə hədəfonış be. ım məxfiyə hədəfon: Enerji ovoştoniyero əmniyyəti əlovə kardey, Bə Rusiyə zid reqional balans icod kardey, bə Ğərəboği mıhosirə orəx doe, ozod bıə məntəğəon cəmiyəti əvəz kardeyku iborət be. Im məcmuə bərnomə idomədə, həminə 4 qılə hədəfon barədə sıhbət bəkamon.

Ğərəboği 2 minnə canqi planiku, Azərbaycan Respublika iminnə hədəf, enerji əmniyyəti əlovə kardey iyən bə inkişof rosniye be. Bə Tavus məntəğə Ermənistoni həmlə, nə fəğət Azərbaycan Respublika şiddətinə niqəroni bois be, bəlkəm enerji istifodə əkəyon niqəroni həm əlovəş kardə.

Tavus enerji tranzit məntəğə, çı Azərbaycan Respublika bə Avropa enerji lulə xətton roy bə hisob omeydə. Tavus məntəğə ətrofədə, harcurnə hərbi hərəkət, Azərbaycan Respublika enerji ovoştoniye əmniyyəti təhdid kardedə.

Əqə Cənubi Ğəfğaz məntəğədə stabiləti və Ğərəboği daveon həl bıbu, nə fəğət bə Tırkiyə səmti eneji ovoştoniyəro bə Azərbaycan Respublika tranziti zərfiyət əlovə bəbe, bəlkəm bə Avropa ittifoği məsrəfi vujuri nez beyro, Mərkəzi Asiya istehsoləkəyon umid həm əlovə bəbe. Qıləy holədə ki Ğərəboği 2 minnə canq, bois nıbıə ki Ğərəboği məsələ barədə, Azərbaycan Respublika iyən Ermənistoni miyono muşkilaton iyən ixtilafon həl bıbu, bəlkəm ım ixtilafon və muşkilaton vey mırəkkəb bıən, çən ım məsələ Ğəfğazədə bə enerji ovoştoniye əmniyyət, mənfiyə təsir noəşe.

Əmmo Azərbaycan Respublika 2 minnə məxfiyə hədəf, məntəğədə balans icod kardeye. Bandiyə Ğərəboği daveon, ğərəz insoni bıhron iyən bəşər həxon ləğv kardey, məntəğə iyən beynəl xalğə ğudrəton və zumandə kişvəron miyono, coqrafiya-stratejik iyən jeopolitiki rəğabəti icod kardəşe. məsələn məntğə ğudrəton miyonədə Tırkiyə və Rusiyə, iyən baynəl xalğə kişvəron miyonədə kali ğərbi kişvəron və sionist rejim həminə vəziyətiku istifodə kardey dumoədən.

Azərbaycan Respublika, muvəffəğ be, Tırkiyə iyən sionist rejimi hədəfon kənoədə, qıləy partiya icod bıkə ki Erməniston-Rusiyə partiya mığobilədə, səbarz bıbu, əmmo ım səbarzəti bə Ğərəboğ iyən Laçin karidorədə Rusiyə sulh mərominə hərbion sakin bey xoto, bə vırə nırəsə.

Əmmo Xosə Tolışon, Ğərəboğ 2 minnə canqi planədə, Azərbaycan Respublika 3 minnə hədəf, bəştə sərzəmini təcrid iyən izolasiyə ğələbə kardey be.

Azərbaycan Respublika, de Erməniston çand qılə mınoğişəş heste. Məsələn Ermənistoni Siyonik ostani səmtiku Nəxcəvan mıstəğilə Republika, Azərbaycan Respublika əsliyə sərzəminiku co bıə. ğanuni surəti, Siyonik ostan Ermənistoni sərzəmine, əmmo Buko de pisixi təhdid iyən vəhşiyə hərəkəton vositə, səyo cəhd kardə ki bə Nəxcəvan sərzəmini oqəteyro, çəyədə qıləy karidori icod ko, qıləy holədə ki Miladi 2020 minnə sori, Noyabrə manqi 9 minnə ruji otəşbasti təvafuğnomədə jıqonə karidori soxte proqonoz bə ni.

Əzizə əməson bə ımrujnə bərnomə quş doe xoto şıməku təşəkkur kardəm, dəvət kardəm bə Rədio Tolışi bərnoməon idomə həm quş bıdənən.