Ğərbədə insonə həxon

Ğərbədə insonə həxon

2010-ə Miladi sori yanvarə manqədə  haft  rixter zuyədə bıə buməlarzə Hayitiş lorzıne ki,220  xonəxo marde və çandə milyon insonon be kə-bə mandin. beynəl-xalğ  Oksfam Fond ki, de fəğrəti iyən vəşyanəti zəminədə mıborizə bardə vey dıjdə xeyriyyə cəmyətonku qıləyniye iyən dınyo veyə fəğrə məmləkətonədə şobəonış heste,iqlə qrupışon bə zəlzələ bıə vırəon vığandeşone.ısət çə fəlokətinə buməlarzəku həşt sor dəvardedə,”Taymz” rujnomə qıləy şok məlumatış dərc kardə ki,çın onemoni beəxloğti  iyən cinsi rısvoyəti həxədə qıləy pardəş peqətə.

Bə”Taymz”-i nıvıştey əsos,Hayitiyədə bıə Oksfami mudir iyən çın təşkiloti çandə qılə koəvonon ki, 2010-ə sori bə bın kişvər bo kardey xoto şıəbin,əyo qıləy mehmonxonədə fahişəxonə ojışon kardə və bə zəlzələ məruz çandə şəxson ehtiyocon rəğmən,çəvonku cinsi cəhəto suyi-istifodə kardəşone.”Taymz” qəzet bə lokal şoydonku qıləyni votey əsos nıvıştəşe:”bın kədə kinon çı Oksfami şirkəti bəştə tan kardəşonbe və nimə uryon bın məkonədə şe-omey kardedəbin.ım vırə bənə parti iyən fahişəxonə formədə be.bovə kardənin ni və odəm cındo bedə”.ın hisobat bə dınyo ziyodə insonon vey yavə təsirış karde və bə Britaniyə camaati ğəzəbi boyis bıə.

Oksfam ğeyri-devlətə xeyriyyə təşkilot  ki,nomış ingilisi zıvonədə mənoş ”Bo vəşyənə insonon  rohətiro Oksford Komitə”-ku peqətə bıə,İngilistonədə 1000 qılə xeyriyyə muəssisə miyono çominə dıjdə xeyriyyə kompaniyəy.ın xyeriyyə 1942-ə sori de dınyoədə fəğrəti bəkam kardey hədəfəi tətit be və 1948-ə sori İngilistonədə ıştə iminə mağazəonışon oj karde.votey bedə ki,çın onemoni İngilistonədə bıə 650 qılə super marketonədə 23 həzo nəfər hiç qıləy maaş nıstənə holədə fəaliyyət nışon doydən.

In təşkilot hasor i mığdor veyə nuyə oləton ya oko doə bıə oləton,de xeyriyyə məğsədi həvatedən və solimə ov iyən xorək çı ehtiyocinə şəxson ixtiyorədə ğərol doydən və həmçinin çı təlim-tərbiyə və məktəbon soxtey zəminədə həm aktivə rolışon heste.min cumlə bə çın onemoni muhimmə mali himoyədoronku kardey bəbe bə Avropə İbemon iyən dınyo Səhiyyə Təşkiloti həm işorə kardey bəbe.

Çın təşkiloti Hayitiyədə əxloği cəhəto skandəlisə əlovə,mıxtəlifə məlumaton çın onemoni deştə həmroon iyən bənə Çad,Cənubi Sudan və co məntəğəon ehtiyocinə odəmon beləyoğətə rəftoron mıntəşir bıə ki, veyə sər-sədoş icod kardə və çın təşkiloti fəaliyyətonış de şubhə və sıvoli dimbədimış kardə.təhğiğaton nışon doydə ki,Oksfami koəkəyonku i dastə Hayiti fəğrə hırdənonışon bə seksual əzob-əziyyəti məruzışon haştə.votey bedə ki,2013-2014-ə soronədə çı Oksfami super marketonədə ko kardə haft qılə əğıl ya ya nevcıvonon de noloyığə rəftori dimbədim mandən ki,çəvonku qıləyni bə qıləy 14 sinnədə bıə nevcıvoni təcavuz kardey bıə.bəzi məlumaton çımiku hikoyət kardedən ki,çı Oksfami məsul şəxson əxloğiyə skandalon Çad məmləkətədə həm tikror bıə.

Bə çın onemoni seqlə mıxtəlifə kişvərədə 120 qılə koəkəyonku bıə parsemoni əsos,11 ta 14 fayiz koəvonon voteydən ki,çı seksual xarakterinə səhnəon şoyd bıən və ya əvon ıştən bə jıqo cinsi əzob-əziyyəti məruz mandən.