Ğıroni prizmaku jimoni məhorəton

Ğıroni prizmaku jimoni məhorəton

Inson həmişə çı səhf və xəto mə`rəzədəy.qahi vaxti çəy fırsiye jıqoye ki,cokəson bəsə insoni ıştənisə vey əy çok vindedən və ehanə inson bəzi vaxt ıştə jimoni royədə ıştəni çı  cokəson nəzəku bıvindo və bəştə erəxo,ıştə ehtimoli fırsiyə vırəon vey çok dəbərəse.fərdi iyən iştimoyi inkişofon,ıştə zəyif iyən zumandə noxtəon zıney sayədə və boştə noğisətiyon bərtərəf kardey royədə cəhd kardeye.tənğıd kardey həm çın zıney amilonku qıləyniye.

Tənğıd kardey yəni dəparsey və ğeymət doeye.tənğıd ıştən həm qıləy məhorət tələb kardedə və bın koyədə inson bəbe çı cokəson aybon dumo nıbu.tənğıdi koyədə bəbe har qıləy kamə əhəmiyyət kəsb kardə çi dıjd cilvə doey nıbu.tənğıd kardey bo konstruktivə təhlili iyən bo hodisəon çok dərk kardero oko doey bedə.tənğıd yəni dəlil nıbə holədə qıləy çi ğəbul nıkardey və be dəlil qıləy çi rədd nıkardey.həyğət ıme ki,təfəkkur qıləy omutey lozım bıə məhorəte və bə məşğ kardey ehtiyociş heste.de təfəkkuri bıə tənğıd,çəmə vucudədə səhihə istidlal kardey,de cokəson çok iyən təsirinə rabitəon bərğərol kardey və oxoyədə bə çokə ğərol ome zumand kardedə və jıqo qıləy məhorəton.de ziyodə məlumaton dimbədim omeyədə,çəvon səhih ya nosəhih bıey vey hoston kardeydə.

Çəmə insonon fırsiyə vırəonku qıləyni ıme ki,veyə məsələonədə be dəlil iyən təfəkkur nıkardə holədə tənğıd  iyən etıroz kardedəmon.har qıləy çi rədd kardey iyən bəy etıroz kardey,deçəy dərki əloğədore.bəbe təyinkəy ki,istidlolon kon zəmon  bə məntıği əsose və kon zəmon duye və kon zəmon ğərole çı isdtidlal kardə fərdi mənfəəton təminko.binobərin tənğıd kardey bənav, bəbe de ın ko səhihə metodi oşno bıbu ta ın bə camiyədə tənğıdi ğəbul kardey boyis bıbu və təmiz, pokə zotə insonon iyən təfəkkuri soyb bıə insonon deəy ğəbul kardey,ıştə ozavziye iyən hərəbaxtəti royədə ğədəm şodo.

Kərimə-Ğıronədə tənğıdi kəlmə mıstəğim iyən sərostə formədə oməni.əmmo kali ayəon bə tənğıdi mevzu işorə kardedə.Ğıron çı tərbiyə iyən hidoyəti kitobe və har vırədə ki,insonon ıştə rostə royku xaric bıbon,əvoni tənğıd kardedə.joqo ki,qıləy vırədə hamyedə:ha imon vardə kəson ha!çıro ıştən əməl nıkardə sıxanon votedon?(Əssaf/2)

Iyo Xıdovənd bə və`də doə bıə əməl iyən rəftori əks boyis bıə təfəkkuri tənğıd kardedə ta fərdon bəştə əhdi əks benışon və bə əhdi bəfokon.çın ko bə insoni ıştə sape dayimi surətədə ko kardey ehtiyociş heste.ın məhorəti bə dast vardey iyən çımi soyb beıyro,bəbe əmə ıştə qırd umrədə məşğkəmon və hejo bəvədə cəhdkəmon ta çəmə ğudrət vey çok bıbu.

Kərimə-Ğıron coqlə vırədə bə cokə sıxan kardey dığğət kardedə və bə insoni yod dənoydə ki,çı sıxanon miyono həmməysə çokə qılə bıvıjno.inson bəpe bə sıxanon ğeymət doey bədiqə və çəvon zəyif iyən zumandə noxtəon zıney bəpeştə,oxoyədə həmməysə çokə qılə bıvıjno.Im çəvon həmonə səhih ya səhih nıbey mıəyyən kardeye ki,əmə bəy tənğıd votedəmon.joqo ki, hamyedə:bəçəmə bandəon bəşorət bıdə!həmonə kəson ki,sıxani məsedən və bəçəvon həmməysə çokə qılə pemandedən.