Osmoniyə surəon-112

Osmoniyə surəon-112

De ın holi ikəs təsəvvır nıko ki,deştə inə iyən mo rabitədə hisson,kardey nibəzıne bə insoni de Xıdo rabitə hakim bıbu.ayə de qıləy oşkoə istisna ın mətləbi ruşin kardedə və hamyedə:”və ehanə ə dıqlə cəhd (və isrorkon) ki,ıştı nızınə çiyon bəmı şərik bıdoyn,(bəvədə) bəvon itoət məkə.(8)

Bəçımi əsos ehanə əvon mışrik bıbon iyən ıştə fərzəndi bə şərikəti dəvətkon,bəbe bəvon itoət nıbu iyən nıpemando.jıqo qıləy surətədə  həm bəbe hejo bəvon ehson kardey bıbu və bəbe deəvon de ədəb iyən ehtıromi iyən təvazu rəftor kardey bıbu.

Ənkəbuti surədə ayəonədə bə ənbiya  iyən navkonə ğovmon saxtə imtovonon işorə bıə.bənə Nuh(ə)-i bıə dıjdə peyğombəronku bino bedə və hamyedə:və əmə Nuhımon bəçəy ğovmi tərəf vığandemone.əv bəşəv bə ruj  ıştə milləti bə tohidi tərəf dəvət kardedəbe.ə həzrət 950 sor bəşəv-bəruj milləti  İbıə Xıdo dini səmt səlo jeşe və hiçvaxti ıştə çın koyku sısti nıqəte.demiyən ğərəz qıləy kamə dastə hiçki imon nıvardeşone.peşo bə Xıdovəndi coqlə dıjdə peyğombəri  yəni bə İbreym(ə)-i soyəx şedə və hamyedə:” Və(bə yod biyə) İbreymi ki, bə zəmon bəştə ğovmi voteşe: Xıdo pərəstışkənən iyən çəyku bıtarsənən. ehanə bızınon ım(ko) boşımə vey çoke”. -16

İbreym(ə) bəştə ğovmi yod dənoydə ki,şımə pərəstış kardə bıton qıləy mıcəssəmən  və ağl iyən şuuri soyb nin.əvon şımə ruziyon malik nin.həyğiyə Xalığ İbıə Xıdoye.çən,şımə ıştə ruzi fəğət çəyku tələbkənən. əmmo  çə ğovmi doə cəvob ğərəz ımi co çi nıbe ki,voteşone:”əy bıkıştənən ya bısutənən! əmmo Xıdovəndi İbreym(ə)-ış çı otəşiku peroxneşe.

Ayəon peşo bə İbreym(ə)-i macəra işorə kardedə və çı həzrəte İbreym(ə)-i zəmonədə bıə  Lut(ə)-i   peyğombəri sərquzəşton bəyon kardedə.Lut(ə)-i ğovm de homoseksualizmi məşğul bedəbin və əxloği cəhəto de vey şiddətinə yavə hərkəton məşğul bedəbin.Lut(ə) Xıdovəndi tərəfiku məmur be ki,əvoni jıqo mənhərif iyən fəsodə koonku oqəto və əvoni bə rostə roy tərəf səbəroko.Kərimə-Ğıron bın xususədə hamyedə: Və(bə yod biyə) Luti ki, bəştə ğovmi voteşe: həyğətən, şımə de qıləy yavə ko məşğuliyon ki, dınyo hiç qıləy milləti jıqo qıləy koş kardəni. Şımə bə merdon soyəx şedon və(təbiiyi jenı-merdəti) roy ğət kardedon(bırniyedon) və ıştə məslicədə(oşko) bevəcə əməlon əncom doydon. çən, çəy ğovmi ğərəz ımi co qıləy cəvobışon nıbe ki, voteşone: ehanə tı ıştə pəyğombərəti iddoədə rostişbu,(jəqodə) Xıdo əzobi boəmə biyə.

Nəhoyətən,Lut(ə)-i dast çı har vırəku kuto bıey bəpeştə,bə Xıdovəndi dərqo dimış qəte və de ğəmo-ğussə pur bıə dıl və holi ərzış karde:”(Luti)Voteşe: Xıdolim ha! mıni bə(ın fosidə) qınokorəğovmi səbarzkə!(30)

Lut(ə)-i ğovm  bə vey yavə fəsodi  aludə bıəbin və umumi məclisonədə ələni iyən əyani surətədə  de bevəcə  əməlon məşğul bedəbin və hiçki əvoni  çın mırdolə əməlonku nəhy kardedənıbe.nəhoyətən,çı Lut(ə)-i dıvo ğəbul be.əzobi məmuron bıə mələkon  xos və reçinıə sima cıvonon formədə çı Lut(ə)-i palu omin.  Və çəmə vığandəyon Luti palu omeyədə, çəvon omeyku norohət be və ıştə dastış(çəvon himoyəku) kırtış karde(bırniyeşe). (məlayikon)voteşone: mətars iyən ğəmqin məbi. əmə tıni iyən ıştı xıyzoni nicot bədomon. illa ıştı jimoni həmro ki,(əv əzobədə) mandə kəsonkue. Həyğətən, əmə bə ım məntəğə bəçəvon fısği(qınon) xoto çı osmoniku qıləy əzob rubəkəmon.-33-34