Osmoniyə surəon-115

Osmoniyə surəon-115

Kərimə-Ğıroni  siminə Rumi mıborəkə surə Məkkədə nozil bıə və şest qılə ayəku iborəte.Peyğombər(s) Məkkədə beyədə muminon mığdor kam be və çı ironıjon de roməvıjon miyono qıləy canq eqıniye ki, oxoyədə ironıjon səbarz bin.Məkkə mışrikon bımi xoşbin bin və ımışon bəştə mışrikəti həx bıey dəlil zıneyşone.de ın ko rabitədə Rumi mıborəkə surə iminə ayə nozil be vəelonış karde ki,harçənd bın canqədə ironıjon səbarz bin.əmmo tikəy nidəbəvarde ki,roməvıjon ğalib bomeyn və təğribən çın naviku xəbə doey vaxt həm bəyon be.bə tarıxi şoydəti əsos,çıə romaəvıjon dəboxoteyku  9  sor nıdəvarde ki, qıləy tojə canqədə əvon bəsə ironıjonsə səbarz və ğalib bin.

Kərimə-Ğıroni ğeybi xəbon min cumlə həmonıə de ğətiyyəti çı naviku  xəbə doey ,çın osmoni kitobi ecozkorəti  iyən çı pərvərdıqori-aləmi bə qırd hestemoni-aləmi  benəhoyətə elmi soyb bıeye ki, mısılmınonış vey umudəvoş kardə..

Rumi mıborəkə surə ayəon dəvomədə bə miad iyən axırəti dınyo nışonəon  dığğət nıkardə holədə əvoni  inkor kardə kəson de etırozi hamyedə:” Ayə əvon ıştə vucudi barədə fik-fam(təfəkkur) nıkardeşone ki, Xıdovənd osmonon iyən zəmini iyən çəvon miyono bıə çiyon, ğərəz bə həxı əsos iyən bo qıləy mıəyyənə zəmoni co çi ofəyəşni? və beşək məxloği veyni bə deştə pərvərdıqori(ğıyoməti ruji) vindemoni kufr kardedən”.(ayə-8)

Çın surə 12-ə ayəku bəpeştə çandə qılə ayədə bə dıqlə qınokor iyən muminon qrupi işorə kardedə və hamyedə: həmonə ruj ki,ğıyomət bərpo bəbe,mucrim iyən qınokoron bə məyusəti iyən  ğəmo-ğussə  ğərğ bəbeyn. Çıro ki, nə deştə qıləy imon iyən əməle-saleh bə məhşəri səhnə bəvardeyn və nə boəvon qıləy koməkəkə bəbe və çəvon həni bə dınyo oqarde və əyo ıştə dəvardə koon  əvəzi beşey imkonışon həm nibəbe.əvon bo Xıdo əvəzi vıjniyə iyən boəy şərik ğərol doə məbudonku ıştə nifrət iyən bezo bıey elon bəkardeyn.əmmo,çımi əvəzi imonışon vardə və salehə əməl bə vırə rosnə kəson,ğıyoməti ruji vəhışti boğonədə ilahi əbədiyə nemətonku bəhrə bəbardeyn və əvon əyo jıqo şoyvonəti bəkardeyn ki, çəvon ım xoşholəti əsər-əlomət,çəvon çehrə və sıfətonku oşko bəbe.

Ayəon dəvomədə de “və min ayatihi” –çəy nışonəonku-kəlmə,tohidi dəlilon iyən pərvərdıqore-aləmi hestemoni-aləmədə bıə nışonəonku  cazibədorə nuktəon bəyon kardedə və bın barədə bə insoni tuliku bıə xılğət iyən bə odəmi nəsli ziyodəti işorə bıə.

Rumi mıborəkə surə 21-ə ayə Xıdovəndi nışonəobnku elon kardedə ki,şımə ıştən cinsiku boşımə jimoni həmroon ofəyəşe ta şımə çəvon kəno orom iyən aşiş bıbən və şımə deşmə jimoni həmroon miyono qıləy zumandə rabitə və rəhmətış ğərol doe.bə ın ayə əsos,jenı-merd iqlə maddə və cinsiku ofəyə bıən.jimoni həmroon miyono rabitə və peyvəndi bə qıləy hissi iyən ğəlbiyə keşeş və cəzb kardey ehtiyociş heste. liza, izdivac iyən vəyə kardey bəpeştə,bəbe çı jenı-merdi miyono bə məhəbbət iyən rəhməti  əsos qıləy  rabitə bə əməl booy və əvon bəbe bə cismi,rufi iyən psixoloji cəhəto bə oroməti bırəson.

Çımisə əlovə çı osmonon iyən zəmini xılğət,ilahi oxoş nıbə ğudrəti nışonəonkuye.çanədə insoni elm iyən zıney inkişofko,ozavziyo,anədə həm  hestemoni aləmədə bıə nuyə nuktəon kəşf bəkarde və səbərəse. həmçinin çı insonon zıvonon iyən dimi ranqon ixtilof ilahi ayəon əzəmətiku bə hisob omeydə.Xıdovənde-Aləm bo bəşəri koon bə səro-səhmon dənoeyro,çı insonon sədo.ranqon.həmçinin çəvon zıvon iyən irğonış de farğ doə formə ofəyəşe.Kərimə-Ğıron bə çoçinətiyon işorə kardə holədə haçmyedə:”bın koonədə bo alimon iyən  nışonəon heste”.