Osmoniyə surəon-126

Osmoniyə surəon-126

In ayəon deməkə ki,çı tohid iyən Xıdo sıfətonku sıxan votedə,miadi məsələ zəminə hozzı kardedə. liza, seminə ayədə bə pərvərdıqori ğəssəm hardedə ki,ğıyomət bəşmə həmməy soyəx bome.

Səba mıborəkə surə ayəon bə miadi inkor kardə kəson işorə kardə holədə,çı alim iyən salehonku sıxan bə miyon vardedə ki,həxı təsdığ kardedə.joqo ki,hamyedə:elmi soybon,ıştı pərvərdıqori tərəfiku nozil bıə çiyon həx vindedən ki, bə məğlub nıbə iyən tarıfi loyığə Xıdo roy hidoyət kardedə.(6)

Çın qrup alimon nəzəku,Kərimə-Ğıron aləmon pərvərdıqori tərəfiku bə peyğombəri nozil bıə.çəy ayəon həx və bəşəri bə hərəbaxtəti tərəf hidoyətəkəy.beşək,har qıləy insofinə alim çın osmoniyə kitobi mehtəvo iyən məzmuni həxədə fikko,ali dərəcədə bıə maarifon,hikmətamizə pandon,ibrətamizə dastonon   iyən ecozkorə elmi bəhson bo çın kitobi həxəti şoyd bəvindeyn….            

Səba mıborəkə surə 10-ə ayə bəpeştə,çı həzrəte Davud(ə) iyən həzrəte Suleymon(ə)-i dastoni barədə sıxan votedə.Xıdovənde-Aləm bə yod dənoydıə ki,əmə bə Davudi ıştə fəzliku dıjdə nemət baxş kardemone və votemone ki,ha bandon iyən ha pərəndəon ha!deəy həmsədo bıbənən və Xıdo təsbihkən və əmə oson boəy nam kardemone.

İmom SADIĞ(ə) hamyedə:”Davud(ə) bə biyobon,daşt iyən toykiyəti şeyədə ,Zəburi tilovət kardeyədə har qıləy bandı-ku iyən pərəndəon deəy bə ico həmsədo bedəbin.”de Xıdovəndi mecuzə  vositə ozon çı Davud(ə)- dastədə nam bedəbe və əv de çəy vositə ğoymə zireh soxtedəbe.

Ayəon peşo bəhsi bə Davud(ə)-I fərzənd Suleymon(ə)-i tərəf bardedə və Xıdovəndi bə Sulıeymon(ə)-I əto kardə nemətonku sıxan votedə və hamyedə:

“Və bo Suleymoni vomon(ram karde)ki,rujobə nezi imanqi roy şedəbe iyən əsr(peştçoştə)vaxti imanqi roy və boəy (sı kardə bıə)mısə çeşmə cari kardemone iyən çı cıniku idastə çəy vədə de Xıdovəndi izni ko kardedəbin və çəvonku har qıləyni ki,bəçəmə əmri pemandedənıbin,bəy əzob çaşdovnedəbimon.cınon çı Suleymoni piyə harçi,mehrobon(məbədon),heykəlon və bənə hovuzon iyən sabitə ğəzənon bıə dıjdə zərfon(ğabon) boəy soxtedəbin.ha Davudi xıyzon ha!(bə qırd ım neməton xoto) Xıdo şukri bə vırə bırosnənən.əmmo,çımı bandəon kamə hissə şık kardedən-12-13”……

Ayəon dəvomədə çı coqlə ğovmiku sıxan votedə ki,çı Davud(ə) iyən Suleymon(ə)-i mığobil noxtədə mandəbin.Xıdovəndi bə ğovmi həm çandə nev nemətonış əto kardəbe.əmmo,əvon bə həmonə Xıdo doə neməton kufr iyən nunkuəti kardedəbin.əvon”Səba ğovm” bin ki,həzrəte Suleymon(ə)-I zəmonədə jimon kardedəbin.Kərimə-Ğıron çəvon barədə jıqo hamyedə:

“Həyğətən,bo Səba ğovmi çəvon sakin bıə vırədə (Xıdo ğudrəti)qıləy nışonə hestebe.rost iyən çəpə tərəfiku dıqlə boğon.Xıdo ruziyonku bəhardənən iyən bəy şukrkənən (ki)qıləy təmizə şəhron (heste) iyən Əbaxşə Xıdo” -15.

Səba ğovm qıləy dəvəşə mədəniyyət və sivilizasiyəşon bıə.əvon çı bandon miyono tuliku qıləy dıjdə səddışon soxtəbe ta bə vironi boyis bıə oveyzon çə həmonə səddi peştono ambo bıbu bımando.çın səddiku peş bıə ovon həm bo çə sərzəmini hevujə vırəon ovdonətiro istifodə kardey bedəbe və əvon de həmonə ovi vositə ıştə boğon iyən kaştemoni sahəon ovdoşteydəbin.çın boğon miyono fosilə de iyande kam be və təğribən bəyənde dəçıkəbin.çəvon sərzəminon çı ofoton və bəloonku min cumlə çı xışkəsori iyən ğəhətiku əmonədə be.veyə neməton de əmniyyəti bə ico,bo əvon qıləy rifohinə jimonış hozzı kardəbe.mənəvi neməti nəzəku həm,Xıdovəndi məğfırət bəçəvon holi şomil bedəbe.əmmo,ın noşukrə millət çın neməton ğədrışon nızıne,kufri riyışon qəte və bə hədərə fəxr kardedəbin.əğniya iyən ərbobon dılışon nıbe ki,beçiz iyən kamə bəroməşon bıə insonon bənə əvon  bın reçinə məntəğəonədə şe-omə bıkon və çəvon dılışon hestebe ki, ım imtiyoz fəğət çəvon inhisorədə bıbu.həyğətədə,əvon ıştən bəştə zılm kardeşone.

Ğəflətən qıləy şiddətinə voş voye və de oveyzi ome həmonə səddon qırd volo bin mandin.qıləy dıjdə seyl cari be ki,çə həmonə reçinə sərzəmini qırd boğon,kaştemoni iyən ovdonə vıron   məhf bin və çı Səba ğovmi dıjdə təməddun iyən sivilizasiyə çı tuli dılədə dəfn be şe.çə həmonə havzə boğonku həni hiççi nımande və çəy əvəzi çandə qılə məzəş nıbə iyən tel bıə və ya beməhsulə doon perəsedəbe. demiyən,Xıdovənde-Aləm bəvon qıləy quşmaliş doe və çəvon cəmiyyətış vırto-voloş karde və çəvon sərquzəşt boçəkəson ibrət dərs be....