Mina faciyə
Mina faciyə
Ğıbonə id islomi dıjdə idonku qıləyniye ki,mıslmınon ha sor əy de id iyən şoyvonəti dəvordınedən. bın mıborəkə rujədə Xıdo Kə zayiron çı Həcci kali əməlon bə vırə rosney bəpeştə,rəsmi surətədə Minadə hoci bedən.əmmo,Hicri-Ğəməri 1436-ə sori yəni miladi 2015-ə sori sentyabri 24 qıləy faciyəvi iyən ğəmqinə ruj be ki,qırd islomi ummətış əzodor karde.bın ruji hafto həzo xarici zayir bə şəytoni sığ ğandə vırə şıəbin,bə cəmyəti izdihom,təzyiğ,təşnəti iyən lınqi jiyədə mandey xoto,ıştən ğıboni bin.
Ğıbonə idi ruji hociyon ziyodə dastə çı Məşərul-Həramiku bə Məkkə nezi bıə Mina sərzəmini tərəf omeydən və de mıxtəlifə roon vositə bə “Rəmy Cəmərat” yəni bə şəytoni sığ ğandə vırə tərəf cəm bedən.deməkə ki,həşi tınd iyən həvosati ğam be,əmmo hociyon bo Xıdo rizoyəti bə dast vardey xoto,de mənəviyyat iyən şoyvonəti ım dırozə roy iyən məsiriku dəvardedən.təbiiye ki, bın zəmonədə çı Səudiyyə Ərəbıstoni məsul şəxon iyən intizomi ğıvvon bəbe ıştə qırd ğıvvon səfərbərkon ta həmmə roon oj bıbu və çı hociyon izdihom bə minimal dərəcə eqıno.əmmo,1436- Ğəməri ya 2015-ə milodi sori,nəinki,əvon qıləy tədbirışon nıvinde,bəlkəm bəçəy əksışon həm əməl karde.
Hociyon bə Cəmərati rəseyro vey muhimmə roonku qıləyni,bəçəvon dimi dəbasteşone.həmonə sori qıləy holədə ki,camaati ziyodə cəmyət çı roonku də vardə holədə be,ğəflətən bo Səudiyyə şahzodəon kərvoni əmniyyəti təmin kardey ehtimoli xoto,həmonə kuçə və roon qətey be.çımisə əlovə fəri iyən qədə kuçəon həm baste be ki,hociyon hiç nıbu çə royku ıştə coni peroxnon.ım qıləy holədə be ki,çı hociyon izdihom ləzə-bə ləzə ziyod bedəbe. sıbi vaxti saat 9-iku bə cəmyəti təzyiği iyən həşi qaməti xoto,tədricən qədə hociyon nəfəs bırniye be.harçənd,ironıj və ğeyri-ironıjə imdodəkəyon ıştənışon bə hodisə vırə rosneşone və veyə odəmon conışon peroxne, əmmo tikəy dənıvarde ki,Səudiyyə əmniyyət ğıvvon əvonışon çə həmonə hodisə vırəku yəni hociyon ğıboni bıə xaric kardeşone.imdodəkə iyən Ərəbıstoni əmniyyət ğıvvon yarəjə bıə kəson de ıştə coni dasto doə kəson bə ico cəm kardedən və əvoni bə kantineri dılə şoydən.bəvon çokə formədə nırəsey xoto,çandə yarəjə bıə kəson həm ıştə coni dasto doydən və Səudiyyə devlət bo cəsədon məlum kardey koyədə həm sabotaj iyən pojənəti kardedə.de tobə ısət həm ki,çın hovlnokə faciyəku se sor dəvardə,ijən Səudiyyə devlət hozzı bıəni ta bə de ın ko əloğədor bə çandə qılə sıvol iyən mubhəmə çiyon cəvob bıdo və hətto çı Mina faciyə şəhidonku ziyodə şəxson dəfn bıə vırə həm məlum ni.
Həlbəttə,Ali-Səud rejimi bo Həcci mərosimi idorə kardeyədə bıə betədbirəti iyən beləyoğətin bıey,qıləy tojə məsələ ni və çın xanedani bə Hicozi hukumət kardeyku,Beyutullahul-Həramədə bo hociyon jıqo tel və bə xoşnıomə koon vey bə və omə.2015-ə miladi sori Mina faciyəku çandə ruj bənav,Məscidul-Hərami səhnədə bə qıləy dıjdə rost kardə krani bəsə zayironsə eqıniye xoto,çandə sa nəfər şəhid be və çandə da xonəxo həm yarəjə bin.1990-ə miladi sori həm bə cəmyəti izdihom iyən bə tuneli həvo təmiz kardə sistemi xərob bıey xoto ki,həmonə tuneliku zəvvoron bə Mina sərzəmin şedəbin,1421 hoci ıştə conışon çı dasto doe.1998,2004 iyən 2006-ə soronədə 700 qıləsə vey hoci bə Səudiyyə polisə məmuron betədbirəti xoto,ıştə conışon çı dasto doe.1987-ə sori həm bə mısılmınon vəhdəti mərosimi iyən çı mışrikonku bəroət iyən nifrəti elon kardey mərosimi bərpo kardey xoto, Səudiyyə polisə məmuron və əmniyyət ğıvvon əvonışon vəhşiyonə formədə şəhid kardeşone.həmçinin,1975 iyən 1997 soronədə həm bə dıqlə otəşi vəş qətey hodisə xoto,çandə sa hoci otəşi dıldə vəşış qəte sute.Həcci səfə mərosimədə bənə ımi anaoliji hodisəon ziyode və hociyon bəbe bın səfədə çı oroməti iyən əmniyyəti dılədə ıştə ibodi mərosim iyən əməlon bə vırə rosney əvəzi,əvon hejo çıə tarso-larzi dılədə bıən.
Ali-Səud rejim 86 sore ki,bə Ərəbıstoni sərzəmini hukumət kardedə və Məkkə iyən Mədinə şəhron çəvon sultə jiyədəy.binobərin,bə bın dırozə soronədə Həcci mərosimi təcrubə əsos,de rohətə formə kardey bəbe çı mıxtəlifə kişvəronku omə zayiron əmniyyəti təmin kardey bəbe vey çokə səviyyədə bıbu və ğəşənqə formədə mudiriyyət bıbu.
