Osmoniyə surəon-128

Osmoniyə surəon-128

Fatıri mıborəkə surə 4-ə ayə bə qıləy muhimmə məsələ işorə kardedə və hamyedə: ğıyomət, hisob-kitob,vəhışt iyən cəhəndım ilahi və`dəonkuye ki,hukmən bəbe və Ğadir iyən hikməti soyb bıə Xıdovənd,bəştə doə və`də xilof nibebəşe.çən,məbodə dınyo jimon şıməni bə dast dəno və çın dınyo sətasponə və bə dast dənoə amilon ,şıməni çın ilahi dıjdə və`dəku ğafilko.6-ə ayədə bə həmmə kəsi çəşnavi doydə ki,şəyton oşkoə formədə şımə deşmıne.şımə həm əy deşmın bızınən və bəçəy vəsvəsəon quş mədənən.çı bıəşəri inhirof çın nuktəkuye ki,hiyləgər və vəsvəsəkə şəyton çəy deşmıne və ın ko boyis bedə ki,əv çı həxə royku beşo və həyğətonku bə diyəro bımando.

Fatıri mıborəkə surə 9-ə ayədə hamyedə:

“Və Xıdovənde ki,vavazonış vığande ta avə təhrikko.çən,əvımon bə mardə sərzəmini tərəf tojnemone iyən deçəy vositə həmonə zəmin çəy mardey bəpeştə bəyji kardemone.ğıyoməti ruji (həm) jıləvoniye”.

Həyğətədə,çı vavazon hərkət iyən avəon cəm bıey  və çəy bədiqə həyot baxşkardə voşi ğətrəon nozil bıey,çən çımon bəpeştə mardə zəmini bəyji bıey,bə çı naqiku hisob bıə qıləy nizomi əsose və bımi şoyde ki,çı cərəyon iyən koon peşrono qıləy həkim və ğudrərinə dast mevcude ki,əy tədbir iyən hudoyət kardedə.

Fatıri mıborəkə surə 10-ə ayə bə mışrikon qıləy dıjdə səhfon işorə kardedə ki,əvon ıştə izzət iyən səbarzəti çı bıtonku tələb kardedən.joqo ki,hamyedə:

“Hakəsi izzətış bıpyo,çən qırd izzət bə Xıdo məxsuse.(bəki bıpyişe bədoe).fəğət pokə sıxan bəçəy tərəf rost bəbe iyən loyığınə ko əy bəpe bəbarde və bo bədə koon nəxşə kəsə kəson, boəvon saxtə əzob heste iyən çəvon hiyləon bə puç bebəşe”.

Zira fəğət əve ki,məğlub bedəni və həyğiyə izzət və səbarzəti çəy paluye.həmonə ayə dəvomədə bə  izzəti rəsey ro,pokə sıxan iyən sofə əğedə zıneydə ki,de salehə əməli bə ico, insoni bəpe bardedə və səbılınd kardedə.ın həmonə ruşd iyən kəmole.peşo bəçəy mığobil noxtə işorə kardedə və hamyedə ki,ə kəson ki,suyi iyən məkrinə planon kəşedən,boəvon şiddətinə əzob bəbe və çəvon nopokə cəhdon məhf bəbe və bə qıləy vırə nibərəse…….

Fatıri mıborəkə surə 12 iyən 13-ə ayəon bə pərvərdıqore-aləmi hikmətamizə ğudrəti işorə kardedə və hamyedə:” Dıqlə dıyo eyni ni.qıləyni şin,lətif iyən (və) peşomənine və qıləyni su iyən tele.əmmo şımə har dıqləyniku  tojə qujdon hardedon və zər-zibo(mirvarid) xaric kardedon iyən bətan kardedon.kəştiyon bəvədə vindedon ki,ləpəon poə kardedən ta çəy fəzliku (ruzi) tələb kardedon və(boçımi xoto) ğasbu şukrkoyn.

Deməkə ki,dıqlə de iyande farğ doə ziyodə dıyo mevcude,əmmo şımə çı har dıqləyniku tojə qujd hardedon və har dıqləyniku ziynət iyən tankardemoni  əşyon ixtixrac kardedon.çımisə əlovə kardey zıneydon de kəştiyon dıyoonədə hərkətkon və ıştə mol iyən məhsulon deçəvon vositə vırə bə vırə kardedon? ımon bəçəy xotoye ki,şımə çı Xıdovəndi fəzliku bəhrə bobənən və ğasbu bəy şıkkon.

13-ə ayədə həm bə Xıdovəndi benəhoyətə neməton coqləyni işorə kardedə ta insoni xəbədo kardə holədə,şık kardey hissi bəvədə bəyjiko.joqo ki,hamyedə:

“Şəvi bə ruji umuj kardedə iyən ruji bə şəvi daxil kardedə və həşi iyən ovşumış ram kardə.çəvon har qıləyni bo qıləy mıəyyənə mıddəti hərəkətədən və bəştə hərəkəti dəvom doydə.

Dınyoədə bıə qırd təzahuron çı insoni mənfəəton cəhətədə hərəkət kardedən və bəşəri jimonədə  çandə nev bərəkəton və neməton sərçeşməy.həşi iyən ovşum eyni holədə komilə surətədə mınəzzəmə formədə ıştə royədə qardedə ta de tosə qıləy mıəyyənə zəmoni bəştə roy dəvom doydən və çəvon qıləy oxonə noxtə və zəmonışon heste.ovşım iyən həşi və çəvon bə hisobi əsos mınəzzəmə şikilədə bıə hərəkət,aləmədə tədbirəkə Xıdo ruşinə nışonəonkuye.ayə çın bəhsiku nəticə sıə holədə hamyedə: “ıme şımə pərvərdıqor.Xıdovəndi hukmronəti fəğət bəy məxsuse.Və şımə çəy əvəzi vanq jıə kəson,xımo donə lu soyb(həm)nin”.

Duyə məbudon bın dınyoədə çı xımo nozıkə lu ğədərədə həm bo insonon nə ziyonışon heste və nə mənfəət. çən,bın surətədə şımə çokonə intizoron heste ki,əv boşımə qıləy ko əncom bıdo ya şımə jimoni anqılon ojko?....