Osmoniyə surəon-130

Osmoniyə surəon-130

Yasini mıborəkə surə Kərimə-Ğıroni sıvı şəşminə mıborəkə surəy,bə peyğombəri(s)  ğəlbi nozil bıə Məkki surəonkuye və de Ysin mığəttəə hərfon bino bedə.

Yasini mıborəkə surə  bə çandə qılə hədison əsos ki,bın zəminədə varid bıə,Kərimə-Ğıroni muhimmə surəonku qıləyniye.joqo ki,hədisonədə  bəy Ğıroni ğəlb nomışon noə.İslomi əzizə peyğombəriku(s) rəsə qıləy hədisədə omə:çı har çi qıləy ğəlbış heste və Ğıroni ğəlb həm Yasine.

In surə de Xıdovəndi bə islomi peyğombəri(s) risoləti şoydəti kardə holədə bino bedə və de se qılə peyğombəron risoləti bəyoni dəvom pəydu kardedə.çın surə ayəonədə pərvərdıqore-aləmi bın hestemoni aləmədə bıə kali əzəməti çı tohidi nışon hisob kardedə və coqləyni ayəonədə bə miad və ğıyoməti ruji məhkmədə sıvol-cəvobi iyən çı vəhışt iyən cəhəndımi xısusiyyətonku bəhs kardedə.

“Yasin,ğəssəm bıbu bə(ğoym iyən)hikmətamizə Ğıroni.həyğətən,tı çı peyğombəronkuş və rostə royədəş. (Ğıron)ğadir,mehribonə Xıdo tərəfiku nozil bıə.ta bə qıləy milləti tars bıdo ki,bəçəvon pıon tars doey bıəni, bəçəy xoto əvon ğafilin(1-6).

Bın ayəonədə  Mığəttəə hərfon bəpeştə Xıdovənde-Aləm bə Kərimə-Ğıroni ğəssəm hardedə və Ğıroni həki  yəni hikməti soyb zikr kardedə.Kərimə-Ğıroni həyğətədə rəhbər iyən navəjən elon kardedə ki,çı hikməti bəon bə insoni dimi oj və əy bə sıratəl-mustəğimi tərəf hidoyət kardey bəzıne.

Həlbəttə,Xıdovəndi bə ğəssəmi ehtiyociş ni,əmmo Kərimə-Ğıroni ğəssəmon hejo dıqlə muhimmə foydəş bıə.iminə foydəş ıme ki,əv bə mətləbon sape təkid kardedə.və coqləyni  qıləy əzəmətinə çi bəyon kardey ki,bəy ğəssəm hardey bedə.

Peşonə ayə qıləy çi ki,bəçəy xoto ğəssəm hardey bıə,bəyon kardedə.joqo ki,hamyedə:bə Həkimə Ğıroni ğəssəm ki,tı çı Xıdo vığandə rəsulonkuş.qıləy risolət ki,de həx iyən həyğəti bə icoye və tı sıratəl-mustəğimədəş.ın ayə peyğombər(s)-I sıratəl-mustəğim yəni rostə royədə bıey vəsf kardedə.yəni çəy dəvəti mehtəvo iyən məzmun nışon doydə ki,çəy qətə ro qıləy mıstəğim iyən sərostə roye.çəy dəvardə jimon həm ımi nışon doydə ki,çəy ro sərostə ro və sıratəl-mustəğime.

Peyğombəron dəvəti həxəti zıneyro bə dıqlə çi dığğət kardey lozıme.qıləyni ıme ki,çəvon dəvəti mehtəvo iyən məzmun təhğığ kardey bıbu ta ruşin bıbu ki,ın mehtəvo de insoni ağl iyən fıtrəti cur iyən i omeydə ya ne? coqləyni ıme ki,çəvon jimon iyən vəzyət təhğığ kardey bıbu ta ruşin bıbu ki,əvon əmonətdor, sədoğətin iyən rostəvıjə insonin ya ne?qıləy surətədə ki,ehanə ın koon mısbət bıbu,ım bəçəvon çı Xıdo tərəfiku vığandey qıləy dəlil bə hisob bome.

Ayəon dəvomədə çı Kərimə-Ğıroni nozil bıey əsliyə hədəfi jıləvoni bəyon kardedə: “(Ğıron) ğadir, mehribonə Xıdo tərəfiku nozil bıə.ta bə qıləy milləti tars bıdo ki,bəçəvon pıon tars doey bıəni, bəçəy xoto əvon ğafilin”.

Həyğət ıme ki,inson bəvədə isloh bəbe iyən hidoyəti ğəbul bəkarde ki,ıştə tohidiyə fltrəti de bevəc iyən bə xoş nıomə əməlon poymol iyən xərob nıko.ehanə jıqo bıbu toykiyəti iyən zılmət bəçəy ğəlb və dıli bənışte və umu bə bəçəy dimi bastey bəbe..

Yasini mıborəkə surə 13-ə ayəku jəqoşə çandə qılə navnə pəyğombəron sərquzəştonku bəyon kardedə ki,bəvon əmr bıəbe ta bışon ıştə bıtpərəst iyən mışrikə ğovmi hidoyətkon.Kərimə-Ğıron həmonə ğovmi de “Əshabul-Ğəryə” nomi zikr kardedə.bə mıfəssıron votey əsos,ın ayəon bə Antakiyə məntəğə milləti ayide ki,çı Şami şəhronku qıləyni bıə və ısət həm çı Tırkiyə zəminiku bə hisob omeydə.çın şəhri əhali  bıtpərəst bin və Xıdo vığandə rəsulon boçəvon bə tohidi tərəf dəvət iyən de şırki mıborizə bardey xoto bəçəvon səmt oməbin.əmmo,əvon de Xıdo Rəsulon mıxolifət iyən təkzib kardey ko məşğul bin.joqo ki, hamyedə: 

Tı boəvon çə şəhri(Antakyəvıjon) əhali misoli biyə(bıjən) ki,Xıdo vığandəyon bəçəvon tərəf omin. bə zəmon ki,(ıştə pəyğombəronku) dı nəfər bəçəvon səmt vığandemone.çən,əvonışon təkzib kardeşone. peşo de seminə şəxsi(ə dılə) zumand kardemone.çən,voteşone:bərosti əmə (Xıdo tərəfiku) bəşmə tərəf vığandə bıəmon.(13-14)

Əmmo,həmonə ıştə roy qin kardə ğovm çı Xıdo vığandə Rəsulon dəvəti mığobilədə voteşone:şımə həm bənə əmə qıləy bəşəriyon və Xıdovənde-Rəhmon qıləy çiş nozil kardəşni və şımə fəğət du voteydon. ehanə Xıdo tərəfiku qıləy firiştə və mələk vığandənin bebu,jəqodə bəbe qıləy mığərrəbə mələk omənin be,nəinki,bənə əmə qıləy inson.əve,əvon bə dəlili xoto Xıdo vığandə rəsulon bə həjə jeydəbin və ilahi əmron ğəbul kardedə nıbin…..