Osmoniyə surəon-131
Osmoniyə surəon-131
Ha holədə,ın pəyğombəron deəvon vey ciddiyə formədə mıxolifət kardə ıştə ro dəqıjnə ğovmiku məyus və sıst nıbin.çəvon cəvobədə jıləvoni voteşone:çəmə pərvərdıqor zıneydə ki,beşək əmə çəy tərəfiku bəşmə tərəf vığandə bıəmon və çəmə ehdədə ğərəz ruşin iyən oşkoə təblığ və rosney co çi ni.əvon boştə həxədə bıey isbotiro,dəlil iyən mecuzəonışon həm vardeşone.
Əmmo,ın kuyədədılə ğovm çı ruşinə məntığ iyən mecuzəon mığobilədə təslim nıbin,bəlkəm,ıştə xuşunət və hoziyətişon tiki həm ziyod kardeşone vəö voteşone:şımə nəhsə odəmiyon,şımə vucud bəçəmə şəhr iyən diyori bədbəxtəti boyis bıə.həlbəttə,əvon bımi həm ğane nıbin,bəlkəm de qıləy oşkoə təhdidi ıştə bevəcə niyyətışon həm zohir və oşko kardeşone.voteşone ki,ehanə şımə ıştə çın sıxanonku dast nıkəşon, hukmən əmə şıməni sənqsar bəkardemon və şıməni bə qıləy dardnokə əzobi giriftor bəkamon.
Bəle,botıli tərəfdoron ,fəsod iyən zılmi hamiyon çun qıləy ğəbul bıəninə məntığışon ni,hejo de təhdid, təzyiğ iyən hoziyəti sıxan votedən.əmmo,həni xəbəşon ni ki,Xıdo roy rəhbəron çəvon ım təhdidon mığobilədə təslim nibəbeyn,bəlkəm çəvon mığovimət tiki həm ziyod bəbe.
Iyo be ki,İlahi Rəsulon deştə bə quşon rəsə məntıği çəvon cəvobışon doe və voteşone:şımə nəhsəri hejo şımə ıştənikuye və əgər dırıst və səhih fikkon,bə ın həyğəti dast pəydu bəkardiyon.bədbəxti iyən siyoə rujəti şımə camiyə muhitış dəqətə və ilahi bərəkaton şımə miyono şıən və şımə çımi amil və səbəbi ıştə mınhərifə fik iyən əmələdə bınəvənən pəydukənən.həyğətədə,ım şıməniyon ki,de şəhvətpərəstəti ıştə jimoni fəzo və sferaşon siyoh kardə və Xıdo bərəkətonışon ıştəku bırniyə.
Bın holədə qıləy (imoninə) merd çı şəhridiyəroə vırəku de daspoçəti bə kofiron soyəx ome və voteşe:ha çımı ğovm ha!bə ın Xıdo vığandə kəson pemandənən.bə şəxson əmron tabe bıbənən ki,boştə dəvəti xoto şıməku hiç qıləy əcr iyən mıkofatışon piyedəni və əvon ıştən həm hidoyətışon pəydu kardə.ın merd ki, əksər mıfəssıron çəy nomışon Həbib ibn Nəccar zikr kardəşone,navko de Xıdo-Rəsulon dimbədim omeyədə çəvon dəvəti həx bıey iyən çəvon təlimon nığılətiş dərk kardəbe və və qıləy sabitğədəm iyən ğoymə imoni soyb bıə muminə şəxs bə hisob omeydəbe.çoko ki,bəy xəbə rəse şəhri mərkəzədə millət bə ın ilahi peyğombəron ələyh usyonışon kardə,sukutışon cayiz nızıne,əvış darışte və de əcələ ıştənış bə şəhri mərkəz rosneşe və boçəvon mıdofiyəro ıştə dasto omə har koyış bə vırə rosne.əv qıləy addiyə inson və jəqo həm zohiriyə ğudrət və şovkətış nıbe.əmmo,bəçəy imoni nuri təsiri xoto,çəy ğəlb ruşin be və bə yəğıni rəsəbe.liza,bə hiççi dığğət nıkardə holədə vo tohidi royədə mıborizə bardəkəson mıdofiyəş karde və bə mə`rəkə daxil be ta həmməkəson bızınon ki,mumin əgət coyli həm bıbu məsuliyyətine və sakit mande iyən tam jıey boəy cayiz ni.
Peşo,əv bə Xıdo vığandə rəsulon həmməysə umdə mesaj bıə tohidi ıştəni soyəx şedə və votedə:mı boçi bə Əkəsi pərəstış nıkom ki,Əv mınış ofəyə?aya ğərəz xıdo co məbudon bıvıjnım ki,ehanə Xıdo bıpyoşe bəmı qıləy zərəl bırısno,şəvon şəfoət bomı hiç qıləy foydəş nibəbe və əvon mıni çəy cəzoku peroxne nibəzıne? bın surətədə mı qıləy oşkoə zəlolətədə bəbem.
In mıboriz iyən mıciohidə mumin,ıştə ğoym iyən rasionalə dəlilon bəyoni bəpeştə,de qıləy bılınd və bə həmmə kəsi quş rəsə sədoelonış karde ki.həmmə kəs bızıno!mı bə bəşmə pərvərdıqori imonım vardə və çəy vığandə rəsulon dəvətım haəm ğəbul kardə.çən,(şımə həm çımı sıxanon)bıməsən (və imon biyənən). əmmo çəy inodkor və tuğyongərə ğovm bə həmonə pokə muminə insoni ələyh hucumışon barde və əvışon şəhid karde.
De Kərimə-Ğıəroni təbiri çın pokə şəxsə mumini ruf ilahi rəhməti ğurbi kəno və de neməti pur bıə vəhıştədə ğərolış qəte. Qıləy holədə ki,əv ijən milləti hidoyət kardey dumo be.bəy votey be:bə vəhışt daxil bıbi.votşeş:ey kaş!çımı ğovm zınəşbe ki,çımı pərvərdıqor mınış baxşe və mınış çı qirami zınə bıə kəson səfədə ğərolış doe.(26-27).
