Osmoniyə surəon-133
Osmoniyə surəon-133
Qıləy holədə ki,çı həşi nur bə həmmə vırə dətıvedə,əmə həşi nuri peqətedəmon və ğəflətən, qırd vırə bə zılmət iyən toykiyəti ğərğ bedə.çoko ki,inson bə şəvi zılməti ğərəğ bedə, ruji nur iyən çəy bərəkəti bəştə yod vardedə . həmçinin,əv nur iyən zılməti xalıği həm bəştə vir dəğandedə.bə şəvi ayid bıə ayəon bəpeştə işorə bıə coqlə nışonəon,bə ruşinəti iyən həşi ayid bıə ayəonin.həşi həm boəvon qıləy nışonəy ki,dayima bəştə ğərolqo və təyin bıə vırə səmt hərəkətədəy.ın ayə çı həşi dayimiyə hərəkəti bəyon kardedə.çı həşi çandə nev hərəkətış mevcude ki,min cumlə bəştə iyən de qırd həşi sistemi bə ico şıti roy qalaktikə qırdo qardedə.
Ha holədə,kon şəxs həşi,ım fovğəladə dıjdə kurə bə hisobi əsos bıə hərəkəti bın oxoş nıbə fəzoədə bə hərəkət vardedə? Aya ğərəz məğlub nıbə iyən zumandə Xıdo,co ikəs bo ım karde ğadire?
Manqi sıftədə çı ovşımi dıqlə sə bəpeye və tədricən çı ovşumi həcm ziyod bedə ta çordə şəvi ki, bə komilə bədri formə dəşedə.çəy bəpeştə,çı həşi dıjdətiku bəkam bedə və manqi oxonə şəvonədə zəyifə hiloli surətədə kamranq bedə ki,çəy ğovsvari bıə dıqlə səş bə saru tərəf bedə və bənə xımo xıçə və şoxə bedə.çı ovşumi imanqi ərzədə hərəkət kardə təyin bıə mənzilqo və vırəon,komilə surətədə dəğiğ iyən bə hisobi əsose.joqo ki,mınəccim iyən astronomon kardey zıneydən de qıləy dəğiğ mıhosibə həşi çandə sa sor bənav bıə hərəkəti proqnozkon.ım çoçinə nizom iyən soxtemon,qıləy təbiyi osmoniyə təğvime və Xıdovənde-Xalıği hamanq və hasornə dəğiğə təğvimış bo insonon ıştə koon tədbir iyən tənzimiro ğərolış doə.
In ayəon bə şəmsi iyən ğəməri sori təğvimon işorə kardə holədə ımi bə yod dənoydə ki, zəmin, həşi iyən ovşımi hərəkət vey dəğiğe və çın hərəkəti mıhosib və hisobi kəşəkəs həm əzın iyən hikməti soybe.
Peşonə ayə çın sor,manq iyən ruji nəzmi dayimi iyən sabitəti həxədə sıxan votedə.joqo ki, hamyedə: “nə həşi bə ovşumi kardey bəzıne bırəso və nə ovşum çəyku dəvarde bəzıne. har qıləyni ıştə mıəyyənə vırədə(dayirədə) sınov hardedən”.
Həyğətədə həşi iyən ovşımi mınəzzəmə şikilədə ıştə orbitədə bıə hərəkət,deməkə ki,de vey barzə surətiye,əmmo hiçvaxto əvon bə iyande pekkuyedənin və bə şəv iyən ruji bə əməl omey koy həm hiç qıləy zərəl rosneydəni.ımon həmmə çı əzın iyən ğudrətinə Xalığı nışonəonku bə hisob omeydə…
Umumən kofiron bo miadi inkor kardero hiç qıləy dəlilışon mevcud ni.əmmo,əvon de bənə ğıyomət kon zəmonədə bəbe sıvoliku bəhs kardey,bəy istehzo iyən məsxərə kardedən.(48-ədə bə ın məsələ işorə bıə.)
Peşonə ayə bə ın sıvoli qıləy ğətiyyətinə cəvob doydə və hamyedə:çın dınyo oxo bo Xıdo qıləy mırəkkəb iyən muşkilə məsələ ni.əvon ğərəz ımi çəş kardedənin ki,qıləy dıjdə osmoniyə ğoymə zikkə və sədo boy bırəso və əvoni ğəfləti surətədə ebordıno.qıləy holədə ki,çəvon sə de canq, cidol iyən deşmınəti tasbuə bıbu.
Çoko ki,osmoniyə dıjdə sədo həmmə vırə qıləy kırtə ləzə və anədə,həmonə məkon iyən həmonə holətədə ğəbzı-ruf bəkarde iyən çəvon coni bəstəne və çəvon de ğovğa iyən sər-sədo pur bıə maddi jimon ğəflətən hamuş bəbe,obəkışe.ın məsələ əxtə de ruşnə surəti bəbe ki,hətto insonon vəsiyyət iyən sıfarış kardey ğudrətışon həm nibəbe və hətto əvon bəştə xıyzon iyən mənzilon oqardey macal iyən fırsətışon həm nibəbe.
Çən,peşo ijən bə suri pu kardey bəbe və naqahən həmmə insonon ıştə ğviku xaric bəbeyn və de dastpoçəti bə məhşər iyən ilahi ədolətinə məhkəmə tərəf səbəro bəbeyn.bın zəmon miad iyən ğıyoməti ruji inkor kardə kəson bəvoteyn:”vay bıbu bəmə! kon şəxsi əməş çəmə hıtə vıronku rost kardeşe? In həmonə çiye ki,Rəhmonə Xıdo çəy və`dəş doəbe və pəyğombəron rostışon votəbe.”peşo bə çın suri pu kardey surəti işorə kardedə və hamyedə:həmonə səyhə və osmoniyə zikkə vahid və ikərəsə vey ni.qıləy barzə vanq bə quş bərəse və həmməkəs çəmə palu hozzı bəbeyn. Binobərin,iminə sədo çı maq vıə mardey sədoeye və dıminə qılə çı jimon iyən ilahi məhkəmədə hozzı bıey sədoye.həmonə ruji bə hiçkəsi izərrə həm sıtəm nibəbe və ğərəz çəvon əncom odə çiyon,bəvon co cəzo doey nibəbe.Yasini mıborəkə surə 55-ə ayəku jəqoşə,çandə qılə ayə bə vəhışt iyən duzəxi(cəhəndımi) əhli holəton işorə kardedə…..
