Zuheyr ibn Ğeyn Bəcəli

Zuheyr ibn Ğeyn Bəcəli

Islom,Pəyğombəre-Əkrəm(s)-I rehləti bəpeştə hejo de təhrifi dimbədim bıə.qırd siyosi ğudrəton cəhdışon kardə ta əy ıştə ləzzəton mənafe cəhətədə oko bıdon.çoko ki,bənə Əməvi,Əbbosi iyən Osmani çandə qılə islomon zuhurış karde.əvon beşəxsiyyətə islomi dumo bin ta milləti bə əsirəti iyən zılləti tərəf bışıkırnon.bın miyono İmom Huseyn(ə)-I nışonış doe ki,İslom çı hurriyyət,izzət və ədoləti məktəbe və deştə xununə inğılobi bəyış qıləy əbədiyyətış baxş karde….

İmom(ə) bbənə qıləy rəhmətiye ki,bə həmməkəsi ıştə xeyri rosneydə və bə mumin iyən kofir,çokə koəkə iyən yavə koəkə və dust iyən deşmıni ıştə bərəkəti doydə və hakəsi deştə istetodi ıştə şua jiyədə perosneydə.İmom Huseyn(ə)  boştə yaro-yavəron ozavziyero nəinki,cəhd kardedəbe,bəlkəm de mıxtəlifə roy vositə səy kardedəbe ta çı Yəzid bin Muaviyə ləşkəri həm çı həlokətiku peroxno.İmom Huseyn(ə) çandə kərə de əvon sıxanış karde.İmom(ə) hətto bo Ubeydullah ibn Ziyadi ləşkəri yol Umər bin Sə`di hidoyət iyən nicotiro səyış karde. Məhərrəmə manqi nəvminə şəvi İmom(ə) ıştə səhabonku qıləyni çı Umər bin Sə`di palu vığandeşe ta əvon de iyande vindemon və mızokirəkon.Huseyn(ə) bə Umər ibn Sə`di  xitobən hamyeşe:”Ha çı Sə`di zoə ha!vay bıbu bətı! Aya tı dılı heste demı canqkoş?aya ıştı oqardemon bəçəy tərəf bıə Xıdoku tarseydəniş?ın ğovmi sə vadə və demı bıbi ki,ın əməl bə Xıdo vey neze və çəy dığğətədəy”.Umər ibn Sə`di çı İmom Huseyn(ə)-I nicot baxş kardə də`vəti cəvobədə bəhonəonış varde və İmo(ə)-I de qırd mehro-məhəbbəti pur bıə də`vətış ğəbul nıkarde.İmom Huseyn(ə)-I tərəfiku bo Umər Sə`di oj bıə xey iyən hərəbaxtəti əv ıştən bəştə dimi bastışe……..

İmom Huseyn(ə)-I qırd məxloğ bənə qıləy şinə fərzəndi piyedəşonbe  və əv həm bo əvoni hidoyət kardey xoto,ıştə dasto omə har ko əncom doydəbe.Ə həzrət ıştə omə roy dırozi bə ziyodə odəmon soyəx şe.çın şəxsonku qıləyni həm Kufə yolonku və ərəbi məşhurə şəxsonku qıləyni bıə Zuheyr ibn Ğeyn Bəcəli be .

Zuheyr İbn Ğeyn Bəcəli Xıdo-Rəsul(s)-I əshobonku qıləyni be.Əmmo,çə həzrəti rehləti bəpeştə və bə Muaviyə hevujə təbliağton xoto,jıqo fik kardedəbe ki,İmom Əli(ə) çı seminə xəlifə Osmani xuni ru kardeyədə dastış bıə.bəçəy xoto,əv bə Əli(ə) iyən bəçəy fərzəndon jəqo həm məhəbbət nışon doydənıbe. İmom Huseyn(ə) bə Kufə səmt hərəkət kardeyədə,Zuheyr həm deştə jimoni həmro bə ico çı Həcciku bə Kufə səmt oqardedəbe.Zuheyr Kufəku xaric bıey bənav və bə Məkkə daxil bey bədiqə,bə İmom Huseyn(ə)-I beyət nıkardey barədə ziyodə xəbəon məsəşbe.əmmo,əv hiç curə piedəş nıbe ta de İmom(ə)-I dimbədim booy.bə həmonə dəlili xoto,de Həcci mənasiki bə oxo rəsey,rəyrə bə Kufə tərəf bə ro dəqıniye. Zuheyr səy kardedəbe hiç qıləy vırədə de İmom Huseyn(ə)-I vəbəvə nıvo.əmmo,çəy qırd ın cəhdon be foydə mande.Zuheyr iyən çəy qədə kərvon “Zərud” məntəğədə noçor mandin İmom(ə)-I kərvoni nezədə bımandon istirohətkon….

Zuheyr ibn Ğeyn deştə nezə odəmon sufrəsə nıştəbin ki,xorək bıhardon.ğəflətən,İmom Huseyn(ə)-I səfir varid be və Zuheyrış vanq je.Zuheyr nıznışe çiçko və sakit mande.çəy jimoni həmro Dəlhəm bint Əmr çı sərqərdonətiku xaric kardeşe və voteşe:”Xıdo-Rəsuli(s) fərzəndi ıştı dumo odəmış vığandə və tı çəy palu şedəniş? Subhanəllah! Çəy tonoku bışi və bəçəy sıxanon quş bıdə və oqard!”.Zuheyr ıştə nıştə vırəku əyşte bəsə sapo və və İmom(ə)-I xıdmət rəse.əmmo,Zuheyr İmo Huseyn(ə)-I paluku oqardeyədə coqləy inson be.Zuheyri əmrış karde ki,xeyməon cəmkon və İmom Huseyn(ə) iyən çəy səhabon xeyməon kəno bıjənon.peşo əy bəştə jimoni həmro dimış qəte və voteşe:”tı ozodiş və bəştə xıyzoni tərəf oqarde bəzıneş.zira,mı piyedəmni çımı tərəfiku ğərəz çokəti co çi bətı bırəso”.peşo əv bəştə dustonış voteşe: şıməku hakəs  bo şəhid bıey dılış heste,demı boy  və kəsi dılış ni şıey bəzıne.peşo qıləy dastonış tərifış karde ki,”Bələncər məntəğədə canq kardedəbimon  və Xıdovəndi əməş səbarz karde.Səlmon Bahili bəmı voteşe:aya Xıdo bətı əto kardə iyən bə dast omə ğənimətonku vey xoşholiş? votemone: bəle! voteşe: havaxti Ali-Muhəmmədi(s) cıvonon seyyidon dərkon karde,ısətnə ğənimətonsə veyə şoyvonəti bakardiyon.Zuheyr ə sıxanış təbir karde və bın rujonədə əvış dərk kardə və ısət həm şoyvonəti kardedəbe ki,çı Xıdo-Rəsul(s)-I xıyzoni mıdofiyə kardedəbe….