İmom Huseyn(ə)-I ğıyomədə Kərimə-Ğıroni təcəlli

İmom Huseyn(ə)-I ğıyomədə Kərimə-Ğıroni təcəlli

İmom Huseyn(ə) de milləti rəhbəri nomi,ilahi huccət və insonon hadi ıştə boho ğeymətinə umrış  bo milləti aqah bıey cəhətədə,camiyə solim kardey xoto iyən çı insonon miyono de iaynde rabitəon ğəşənq kardeyro sərfış karde.ə həzrət çı har qıləy nodırıst və kəcə çiyon mığobilədə mande və çə zəmoni camiyə bo bənə Yəzidi bıə qıləy fərdi ğəbul kardero hozz beyədə,əv nəinki,deştə sıxanon Bəni-Uməyyə cinoyətonış ifşo karde,bəlkəm deştə şımşi bo həxı mıdofiyə kardero te tosə ıştə coni oxonə nəfəsi   mıborizəş barde.Huseyn(ə) bəştə bə ın hərəkəti Əmr be məruf iyən nəhy əz munkər nomış noe və ıştə sıxan iyən bəyonədə dayimi surətədə bə ın dıjdə fərizə təkid kardedəbe.ğasbu votey bəbe İmom Huseyn(ə)-I ıştə ğıyomi bərpo kardey təbyinədə həmməysə oşko və rəsə təbir ım məşhurə cumləy ki, hamyeşe:”mı fəğət boştə cəddi vardə dini islohiro ğıyomım karde.çımı dılım heste əmr be məruf iyən nəhy əz munkərkəm və deştə cəd iyən deştə pı Əli ibn Əbi Talıbi(ə) şıə roy rəftorkəm”.

İmom Huseyn(ə)-I ın sıxanon Kərimə-Ğıroni təlimonkuye ki,çandə qılə ayəonədə de ojə-oşkoə holəti bə əmr be məruf iyən nəhy əz munkəri bərpo kardey əmr kardedə.joqo ki,hamyedə:” Şımə miyono bəpe i qrup bıbu ki(cokəson) bə xeyə ko dəvət bıkəyn əmr be məruf iyən nəhy əz munkər bıkəyn və əvonin nicot peydu kardəkəson”.Ə həzrət həm de qıləy sıxani Kərbəlo ğıyomi hədəfon bəyon kardedə və əy əmr be məruf iyən nəhy əz munkər zınedə və hamyedə:”piyedəme bə çokə koo əmrkəm iyən bevəcə koonku nəhykəm”.

İmom Huseyn(ə)-I ğıyomi sıftəku de tobə çə həzrəti şəhodəti zəmoni bıə məntığ,mığovimət iyən de zolımon mıborizə bardey be və İmom(ə) ıştə qırd sıxan iyən xıtbəonədə bəştə kardə inğılobi prinsipi yəni  bə dini unsur iyən əmr be məruf iyən nəhy əz munkəri təkid kardedəbe.İmom Huseyn(ə) de Hurri sərkərdəti bıə Yəzidi ləşkəri dimbədim omeyədə və çı Kufəvıjon bəbəfoəti oşko beyədə,joqoş hamye:”aya vindedəniyon ki,bə həxı əməl bedəni iyən botıli vəy qətey bedəni.jıqo qıləy şərayitədə bə mumini lozıme ki,ğıyomko və bo deştə pərvərdıqori vindemon kardero aşığ bıbu”……

İmom Huseyn(ə) bəştə buzurquvarə cədd peyğombəre-əkrəmi(s) nəğli əsos,vanqış je:”havaxti vindeyone qıləy sıtəmkorə hakim Xıdo həromi həlol kardedə və de Xıdo bastə bıə əhd-peymoni darıştedə və de Xıdo-Rəsuli(s) şəryət iyən sınnəti mıxolifət kardedə və de Xıdo bandəon qıno,deşımınəti iyən ədovət kardedə və həmonə hol iyən vəzyəti de sıxan ioyən əməli əvəz nıko,Xıdovənd hukmən əy bə qıləy dardnokə əzobi bərosne…Xıdo həromon həlol və həlolonışon hərom kardə və mı bəsə həmmə kəsisə veyə ləyoğətım heste ki, ın vəzyəti əvəzkom”…….

İmom Huseyn(ə) ki,boştə çı Mıdinəku bıə xuruc iyən ğıyomi çandə qılə mıxtəlifə cəhətonış nəzədə qətəşbe,de  Mərvan Həkəmi mıbohisə bəpeştə,bə ğərol ome şəvi zılmətədə yəni Hicri-Ğəməri şestminə sori Rəcəbə manqi 28-ə şəvi deştə xıyzoni uzvon yəni nezə odəmon iyən yaro-yavəron bə ico Mədinə tərkkon və ə həzrət Mədinə kuçəonədə bəşəvnəy hərəkəti zəmonədə ıştənış de İmrani zoə  Mosə mığoyisəş karde ki,çı fironi zılmiku şəvi nimədə bə səhro tərəf fərolış karde.İmom(ə) çı Mosə(ə)-I həmonə saxtə şərayiti bəyon kardə ın ayə tilovət kardedəbe:” Çən, (Mosə)çı şəhriku xaric be. qıləy holədə ki, niqəron iyən de tarso-larzi voteşe: Xıdolim ha! mıni çı sıtəmkorə ğovmi(dastiku) peroxon”.

İmom Huseyn(ə) Mədinəku de tobə Məkkə məsofə şəş ruji ərzədə dəvardey bəpeştə,Hicri-Ğəməri 60-ə sori Şəbonə manqi seminə ruji bə Məkkə varid be və de qıləy nığılə nəzə ijən ıştə vəzyətış de həzrəte Mosə(ə)-I mığoyisəş karde və de çə yolə pəyğombəri tələbi zıvoni ın ayəş tilovət karde:” Və çoko Mosə bə Mədyəni tərəf dimış qəte, voteşe: umu heste çımı pərgvərdıqor mıni bə rostə roy tərəf hidoyətko”…..

Çı zılm iyən sıtəmi mığobilədə ğıyom kardey,həmməysə muhimmə vəzifəy ki,Xıdovəndi əvış Kərimə-Ğıronədə bə həzrəte Mos(ə)-I əmrış kardə.Xıdovənde-Aləm ıştə pəyğombər Mosə(ə)-iku tələbış karde ta əv çı Fironi zılm iyən fəsodi mığobilədə tam nıjəno və boştə milləti çəy sıtəm və zılmiku peroxnero ğıyomko.Taha mıborəkə surə 24-ə ayədə hamyedə:”izhəb…..

İmom Huseyn(ə) həm bə camiyə sakit iyən tam jıey isyonış karde və ıştə ğıyomi muhimmə hədəfonku qıləyni həm deştə zəmonə fironi zılm iyn fəsodi cihod iyən mıborizə bardeyış elon karde.ə həzrət sıtəm vində kəson mıdofiyə,bo Xıdovəndi roziyəti cəlb kardero cihod iyən peyğombər(s) iyən Əli(ə)-I məktəbədə  bo sosyal ədoləti bərpo kardero cəhd kardey fərhənqış  bəyji karde və islomi iyən insoni camiyə muhitədə çı bıt iyən şırki rınə bırniye dumo be.joqo ki,hamyedə:az həmməysə vey ləyoğətınim ta bə Xıdo dini komək bırosnom iyən çəy şəryəti əzizkom  və Xıdo royədə ciohodkom ta çəy nomi səbarzkom.