Osmoniyə surəon-138
Osmoniyə surəon-138
Saffati mıborəkə surə 114-ə ayəku de tobə 122-ə ayəon Xıdovəndi bə həzrəte Mosə(ə) iyən Harun(ə)-i nisbətədə bıə lutfon i hissəku bəhs kardedə. Və bərosti əmə bə Mosə iyən Haruni mınnət nomone.və ə dıqlə iyən çəvon ğovmımon qıləy dıjdə ğəmiku peroxnemone.və bəvon komək kardemone.çən,əvon səbarz bin. Və bə dıqlə ruşinəkə kitob domone və ə dıqlə bə rostə roy hidoyət kardemone.və bo ə dıqlə omə (nəslon) miyono (çokə nom)oqətemone. Səlom bıbu bə Mosə iyən Haruni.əmə jıləvoni çı çokə koəkəyon mıkofati doydəmon.həyğətən,ə dıqlə çəmə imoninə bandəonku bin.-114-122
Ayəon dəvomədə xulosəvari formədə bə həzrəte İlyos(ə)-i sərquzəşton işorə kardedə.İlyos(ə) Xıdo vığandə rəsulonku be və çəy ğovm həm bıtpərəst bin.ə həzrət bəştə ğovmi xitob kardə holədə hamyeşe:aya şımə Bə`l nomo bıə bıti pərəstış kardedon və həmməysə çokə xalığon vadoəyone?
Və bərosti İlyos çəmə vığandəyonku be.bə zəmon ki,bəştə ğovmi voteşe:aya(Xıdoku) tarseydəniyon? Aya Bə`li bıti vanq jeydon?(pərəstış kardedon?) və həmməysə çokə xalıği vadoydon? Qıləy Xıdo ki,şımə iyən şımə sıftənə pıon pərvərdıqore.
İlyos(ə) milləti çı yavə koonku nəhy kardedəbe və əvoni bə aləmon pərvərdıqor bıə vahidə Xıdo tərəf dəvət kardedəbe.ə həzrət həmonə bıtpərəstə ğovmi mızəmmət kardə holədə bəvon hamyeşe:şımə ıştə iyən ıştə pıon pərvərdıqor bıə Xıdo vadoydon?əmmo həmonə zolımkorə ğovm bə Xıdo ın pəyğombəri nəsyət və sıxanon quş nıdoşone və ə həzrətışon inkor karde.
Saffati mıborəkə surə bə Lut(ə)-i macəra qıləy kırtə işorə kardey bəpeştə,peşo yəni 139-ə ayəku de tosə 148-ə ayəon bə həzrəte Yunis(ə)-i sərquzəşti işorə kardedə.Yunis(ə) həm bənə co ilahi ənbiya və pəyğombəron ıştə dəvətış çı tohidiku iyən de şırki və bıtpərstəti mıborizə bardey binoş karde.peşo ə həzrət deştə camiyə fəsodon mıborizə bardey koş dəvom doe.ə həzrət hejo bənə qıləy mehribonə pı bə həmonə ıştə roy qin kardə ğovmi pand iyən nəsyət doydəbe,əmmo qıləy kamə dastə bəy imon vardeşe.Yunis(ə) ıştə ğovmi hidoyət kardey koyku noumu be və bəvonış nifin karde.
Əzobi nozil beıy zəmon ome nez be.Yunis(ə) çəvon miyoniku beşe şe.və holınki,əv vey ğeyzin iyən əsəbi be.ə həzrət ome rəse bə qıləy dıyo sahili.Yunis(ə) çı dəyo kəno de cəmyəti pur bıə qıləy kəştiş mışohidəş karde və çəvonku xahişış karde ki,əy həm bə həmonə kəşti suvarkon.ə həzrət bə həmonə kəşti suvar be və de həmonə camaati bə ico bə ro dəqınin.ğəflətən qıləy dıjdə balinə bə kəşti hərəkəti mane be.kəşti sərnişinon voteşone ki,bəpe çəməku ikəsi bığandəmon bə dıyo bıdə həmonə balinə əy bəhəy və illa əv çəməku dast nibəkəşe.əve əvon pışkışon ğande və pışk se kərə bə Yunis(ə)-i nom eqıniye.kəşti əhl noçor mandin və Yunis(ə)-şon bə dıyo ğandeşone və həmonə balinə həm əvış ebordıne.
