Osmoniyə surəon-139

Osmoniyə surəon-139

Ha holədə Yunis(ə) çoko ki,macəraş jıqo vinde,vey rəy ıştə səhvış dərəse.çı həmonə dıjdə moy toykiyə ləvədə deştə qırd vucudi bə Xıdovəndi dərqo dimış qəte və Xıdovəndiku təğaza və tələbış karde ki,əy bıbaxşo iyən əfko. Saffati mıborəkə surə 143 iyən 144-ə ayonədə hamyedə:”ehanə əv Xıdo təsbih əkəyonku bıənəbe,hukmən de tobə ğıyoməti ruji (həmonə)moy luzədə əmandi”.

Əv,bəştə pərvərdıqori təsbihi xoto,bə ilahi əfvi şomil be.həmonə dıjdə moy çı qıləy bebeməy iyən hışkə japə iyən sahilış bıə dıyo kəno Yunis(ə)-ış bə bi şodoşe.de Kərimə-Ğıroni təbiri:”Əmə əvımon qıləy hışk iyən rəsəy nıbə sərzəminədə şodomone,qıləy holədə ki,əv noxəş be”.

Yunis(ə) noxəş iyən beholə formədə çə balinə ləvəku ozod be və bə bi beşe.ijən iyo ilahi lutf və rəhmət bəy şomil be.Kərimə-Ğıron hamyedə:”əmə boəy  ku(borani) kul perosnemone ta çəy pan iyən nəminə livəon soğnədə orom bıbu(istirohətko)”.

Co tərəfiku həm Yunis(ə) ıştə ğovmi de ğeyz iyən əsəbi tərk kardeyədə iyən ilahi əzobi nışonəon oşko beyədə,həmonə ğovm oğo bin iyən bəştə omin.əvon bəçəvon miyono bıə qıləy alimi palu şin ta qıləy çorə roy pəydukon.de həmonə alimi rəhbərəti cəmyət cəm bin və bə biyoboni səmt hərəkətışon karde ta de ars,bəme iyən deştə qınon muxlisonə şikilədə tobə kardey ko məşğul bıbon.iyo be ki,çı bəlo və əzobi pardəon bə kəno şe və tobəkə muminə cəmyət de ilahi lutf və kərəmi nicotışon pəydu karde.

Yunis(ə) çın macəra bəpeştə,bəştə ğomsi soyəx şe və vinedeşe ki,çəy hicrət kardə zəmonə bıtpərəsət bıə çəy ğovm,ısət Xıdopərəst iyən mumin bıən.əv çı milləti ım təhəvvul iyən əvəz bıeyku,vey heyrtəin iyən mot mandəbe...