Ğərbədə insonə həxon

Ğərbədə insonə həxon

Sıxan və bəyoni ozodəti ki,çı demokratiyə əsos iyən fundamente və min cumlə çı insonə həxon məbhəsi həmməysə əsosə qıləyniye,çı har qıləy kişvəri jurnaliston tələbi bəştə təsiri ji dənoey bıey bəzıne və ım muhimmə amil bə jurnaliston ıştə reportaji hozzı kardey koyədə səbəsojəti məhdud bıey həm boyis bedə. binobərin jurnaliston iyən mediya sahədə koəkəyon nığo doey de çəvon sıxani ozodəti oqətey qıləy nezə rabitəş heste.həyğətədə,istidlol kardey bəbe ki,çı jurnaliston hədəf demokratiya,sıxan və bəyoni ozodəti hevujə şikilədə bərpo kardeye və nəticədə bə jurnaliston harcurnə repressiya və hucum,bə ozodətiyon prinsip və usuln həmlə kardey mənoədəy.əmmo, ğərbi himoyə jiyədə bıə kali diktatorə rejimon bə jurnliston təzyiğ nışon doydən və hətto çəvon jimon iyən həyoti həxı həm çəvon dasto seydən və əvoni bə ğətl rosneydən.bın rujonədə çı Camal Xaşuğci daston ısət çı qırd dınyo xəbə vositəon səyfəon iminə titr və əsosə xəbəonkuye.Camal Xaşuğci ərəbi məşhurə jurnalist və Səudiyyə Ərəbıstoni varis şahzodə siyosəton saxt tənğıdəkə bə çın kişvəri İstambulədə bıə konsuləti daxil bıey bəpeştə ısət çandə vaxte ki,qim bıey bə ziyodə ajiotaji boyis bıə.

Jamal Khashooggi “Əlvətən” rujnomə və Səudiyyə televiziya kanali sabiğ  sər redaktor be ki,fəğət qıləy kırtə mıddətədə əyoş ko karde.əv çandə sor be ki,bə Səudiyyədə hakim bıə  xanedani nezə odəm be və çı Səudiyyə çandə qılə yolıə rəsmi şəxsi mışovir və məsləhətçiş ko kardə.

Çəy çandə qılə duston həbs bıey bəpeştə,çəy “Əlvətən” qəzetədə bıə sutun ləğv be və votey bedə ki,bəy çəşnavişon doəb ta əv həni ıştə”Tvitter” səyfədə hiççi nınıvışto.əv peşo çı Ərəbıstoniku xaric be və bə Amerkə şe və əyo bo  “Vaşinqton-post” qəzet i koş karde və ərəbi iyən ğərbi televiziya kanalonədə bənə qıləy siyosi-icmolçi bəştə mediya fəaliyyəton dəvom doydəbe.

Cənob Xaşuğci de Amerkə “Vaşinqton-post” rujnomə həmkorəti kardedəbe və oktyabrə manqi 10 seşambə ruji peşt çoştə bə Səudiyyə Ərəbıstoni İstambulədə bıə konsuləti bina daxil bıə.əv bə Amerkə mıhocirət kardey bədiqə Vaşinqton Disi neziyədə ğeyddiyatış hestebe və çandə ruj çımi bənav boştə şəxsi sənədon təkmil kardey xoto,bə Ərəbıstoni Tırkiyədə bıə konsuləti ovardış kardəbe və əv bo ijən sənibəton izdivac kardero hozzı bedəbe.

Vaşinqton-Post rujnomə nıvıştəşe ki,cənab Xaşuğci bo idori koon əncom doeyro bə Ərəbıstoni konsuləti varid bıə və həni çəyo bə bi beşəni.Xaşuğci nomizəd və pəvəndi həm de tosə konsuləti deəy bə ico bıə, əmmo bə bə konsuləti daxil bıey icozə doey bıəni.cənab Xaşuğci bə konsuləti daxil bıey zəmonədə bəy votey bıə ki,ıştə mobil telefoni təhvil bıdo .qıləy ko ki,kali səfərotxonə iyən konsulətiyonədə bə vırə rosney bedə.çəy nomizəd Xədicə votəşe ki,Xaşuğci mobil telefon çəy palu be və əy bə Xədicə votəşe ki, ehanə əv çın konsulətiku bə dumo nıoqardo,bəvədə əv bə Tırkiyə prezdent Rəcəb Təyyib Ərdoğani mışovironku qıləyni zanq bıjəno.cənab Xaşuğci nomizədi votəşe ki,de tobə şəvi nimə çı Ərəbıstoni konsuləti vədə mandə çəş kardəşe,əmmo Xaşuğciku hiç qıləy xəbə beşəni və həni oqardəni.

Səudiyyəvıjə 58 sinninə jurnalist çı Səudiyyə Ərəbıstoni varis şahzodə Məhəmməd bin Salmoni siyosəton tənğıd kardey bəpeştə,ın kişvərış tərk kardəbe.Camal Xaşuğci ımsornə cari sori sentyabrə manqədə Vaşinqton-post qəzetədə jıqoş nıvıştəşbe:mı ıştə kə-bə,xıyzon iyən kom tərk karde və ıştə sədo rost iyən barz kardedəm və ğərəz ımi co qıləy co ko bə vırə rosney,bə zindon iyən həbsxonəonədə pəleşk iyən pəjmordə bıə şəxson xəyonət bəbe.az çı veyə şəxson ıştə sədo bekardey nızınə zəmonədə sıxan votedəm”.

Tırkiyə rəsmi şəxson votedən ki,əvon bə ın nəticə rəsən ki,Ərəbıstoni məşhurə jurnalist iyən tənğıdəkə Camal  Xaşuğci  de qıləy 15 nəfər heyəti ki,çı Ərəbıstoniku bə İstambul oməbin, çı Ərəbıstoni konsuləti daxilədə bə ğətl rosney bıə.

Tırkiyə rəsmi şəxsonku qıləyni bə Royters aqentəti iyən Vaşinqton-post qəzeti votəşe:əmə sıftədə jıqo fik kardedəmon ki,cənab Xaşuğci çı konsuləti dılədə bə ğətl rosney bıə.əmə hisob kardedəmon ın ğətl çı naviku bə proqrami əsos hozzı kardey bıə və peşo çəy cəsədışon çı konsulətiyiku xaric kardəşone.